Прадстаўнікі 95 краінаў свету, у тым ліку такіх, як Аўстралія, Тайланд і Канада, прымуць удзел у 50-м Міжнародным эўхарыстычным кангрэсе. Адбудзецца ён у Дубліне (Ірландыя) з 10 па 17 чэрвеня 2012 г. Удзел у форуме прыме і дэлегат з Беларусі.

Кангрэс пройдзе на тэму «Эўхарыстыя: камунія з Хрыстом і з нашым бліжнім». Вядома, што ў межах кангрэса пройдзе тэалагічны сімпозіум, прысвечаны 50-й гадавіне распачацця Другога Ватыканскага Сабору. На ім удзельнікі будуць разважаць над эвалюцыяй такіх навуковых дысцыплін, як сістэматычная, маральная, біблійная тэалогія, літургіка, місіялогія.

Эўхарыстычныя кангрэсы праходзяць раз у чатыры гады. Папярэдні з’езд адбываўся ў канадскім Квебеку ў 2008 г. У Ірландыі эўхарыстычны кангрэс адбудзецца не ўпершыню: у гэтай краіне праходзіў ён і ў 1932 г.