Упершыню «Прэмію Ратцынгера» ўручаць жанчыне

18.06.2014 13:45

17 чэрвеня ў Ватыкане назвалі імёны лаўрэатаў прэміі «Ватыканскага фонду імя Ёзэфа Ратцынгера - Папы Бэнэдыкта XVI» за 2014. Прэмію атрымалі францужанка Ан-Мары Пелецье (Anne-Marie Pelletier), спецыяліст па герменеўтыцы і біблейскай экзэгетыцы, якая шмат часу ў сваёй дзейнасці прысвяціла пытанню становішча жанчын у хрысціянстве і Касцёле, польскі біблеіст святар Вальдэмар Храстоўскі (Waldemar Chrostowski), які займаецца каталіцка-іудзейскім дыялогам. Паведамляе Радыё Ватыкана. Ан-Мары Пелецье стала першай жанчынай, каму ўручаць «Прэмію Ратцынгера». Прэмію ўручаць ў чацвёрты раз 22 лістапада 2014 г. Лаўрэаты атрымаюць дыпломы і грашовае ўзнагароджанне памерам у 50 тыс. еўра. «Ватыканскі фонд імя Ёзэфа Ратцынгера - Папы Бэнэдыкта XVI» заснаваў у лістападзе 2010 года Бэнэдыкт XVI, які ахвяраваў у фонд атрыманыя сродкі ад сваёй літаратурна-тэалагічнай дзейнасц. Падтрымліваюць фонд і дабрачынцы. «Прэмія Ратцынгера» прызначаная для таго, каб распаўсюджваць тэалогію ў свеце камунікацый і спрыяць яе зносінам з людзьмі. (AYU)