У Бразіліі пройдзе рэгіянальны кангрэс душпастырства сем’яў

24.09.2014 12:55

З 26 да 28 верасня ў бразільскім горадзе Сан-Луіс (штат Мараньян) на паўночным усходзе краіны пройдзе ХIV Кангрэс душпастырства сем’яў на тэму «Сям'я — пераказчыца веры». Паведамляе польская рэдакцыя Ватыканскага радыё. Мэта сустрэчы, якая збярэ біскупаў, святароў, каардынатараў аддзелаў душпастырства сем’яў, катэхетаў, сем’і, якія задзейнічаны ў душпастырскай працы, — дапамагчы сем’ям ісці дарогай, якая вядзе да хрысціянскага перажывання паклікання жыць у сям’і. Гаворка ідзе таксама пра абнаўленне душпастырства сем’яў, каб спрыяць пабудове грамадства «з чалавечым тварам», а таксама дапамозе ў аднаўленні шляху веры ў сям’і, у прыватнасці, праз паглыбленне ведання Катэхізіса Каталіцкага Касцёла. Арцыбіскуп Жазэ Белізарыа да Сілва, які ўзначальвае мясцовую архідыяцэзію і з’яўляецца віцэ-старшынёй бразільскай Канферэнцыі Біскупаў, адзначыў, што асаблівая ўвага будзе надавацца выклікам і перспектывам евангелізацыі сям’і ў наш час. «Без сям’і ў грамадства няма будучыні, — сказаў іерарх. — адной з сур’ёзных праблем сучаснага свету з’яўляецца няўстойлівасць, далікатнасць сем’яў. Вельмі важна, каб ствараліся ўраўнаважаныя, моцныя і вынослівыя сем’і, нягледзячы на розныя жыццёвыя цяжкасці». (AYU)