25 гадоў таму Папа Ян Павел II прыняў у сябе Міхаіла Гарбачова, які стаў першым савецкім лідарам, што прыбыў з афіцыйным візітам у Ватыкан.

Як паведамляе беларуская рэдакцыя Ватыканскага радыё, сустрэча хоць і насіла афіцыйны характар, яна стала нечым большым, чым проста прыватнай аўдыенцыяй, хоць не мела статусу дзяржаўнага візіту, паколькі тады Савецкі Саюз і Святы Пасад не падтрымлівалі дыпламатычных адносін. І таму, вядома, не было ніякага афіцыйнага прывітання і разам не віселі савецкі і ватыканскі сцягі.

Але тонкасці пратакола не пашкодзілі гістарычнаму значэнню сустрэчы. Вышэйшы прадстаўнік ваяўнічай атэістычнай ідэалогіі аказаў пашану Папе, які нястомна асуджаў камунізм як прадукт зла.

Вынікам сустрэчы стала прызначэнне ў 1989 г. Янам Паўлам II каталіцкіх біскупаў у тады яшчэ савецкіх рэспубліках Літве і Беларусі. Хутка пасля гэтага ў СССР быў прыняты новы закон аб свабодзе рэлігіі. Пазней, пасля распаду Савецкага Саюза ў 1991 г., Святы Айцец наведаў большасць былых савецкіх рэспублік, якія ў той час былі свабоднымі і незалежнымі дзяржавамі. Але візіт у Маскву так і не адбыўся.

Трэба адзначыць, што ў наступныя гады Гарбачоў і Ян Павел II падтрымлівалі амаль сяброўскія адносіны. Былы савецкі лідар быў частым госцем у Ватыкане.

(IL)