Немка Жазэфіна Маркман, актывістка жаночай арганізацыі Femen, аштрафавана на 1200 еўра за акцыю пратэсту ў кёльнскім саборы падчас Імшы-пастэркі.

Пра гэта паведамляе газета Зюддэйчэцайтунг.

24 снежня 2013 года актывістка Femen выбегла ў прэзбітэрый і, узлезшы на алтар, у напаўаголеным выглядзе пачала свой пратэст. Свой учынак дзяўчына патлумачыла пратэстам супраць Каталіцкага Касцёла і асабіста кардынала Ёахіма Майснера, якія нібыта не паважаюць правы жанчын.

Суд над парушальніцай завяршыўся толькі нядаўна. 21-гадовай Жазэфіне Маркман пагражала да трох гадоў турэмнага зняволення або грашовы штраф.

У выніку дзяўчына абвінавачана ў «перашкодзе ажыццяўлення рэлігійных практык» і павінна выплаціць штраф у памеры 1200 еўра.

(ILS)