Фільм «Іда» польскага рэжысёра Паўла Паўлікоўскага атрымаў прыз Амерыканскай акадэміі кінамастацтваў у намінацыі «лепшы фільм на замежнай мове». «Жыццё поўнае сюрпрызаў», — так пракаментаваў рашэнне журы рэжысёр фільма пасля таго, як Ніколь Кідман абвясціла пераможцу.

Стужка пра хрысціянскае прабачэнне была знятая ў 2013 годзе. Падзеі фільма адбываюцца ў Польшчы ў 1960 годзе. Ганна — галоўная гераіня фільма — вырасла без бацькоў, яе дзяцінства і юнацтва прайшлі ў кляштары.

Дзяўчына вырашае стаць манахіняй, але перад гэтым плануе сустрэцца з адзінай сваячкай — Вандай. Ванда раскрывае Ганне яе мінулае.

Высветлілася, што Ганна габрэйка, якую аддалі ў кляштар дзеля выратавання ад нацыстаў падчас Другой сусветнай вайны, а яе бацькі сталі ахвярамі Халакосту. Каб дакладна высветліць трагічны лёс сям’і, гераіні фільма разам адпраўляюцца ў падарожжа. На гэтым шляху яны сустрэнуць выпрабаванні, якія паставяць пад сумнеў іх веру. Нягледзячы на цяжкасці, жанчыны паспрабуюць жыць як раней, але толькі ў адной з іх гэта атрымаецца.

Паводле grodnensis.by, (MV)