У тэкст Ларэтанскай літаніі далучылі новы заклік |
29.04.2015 16:21 |
Гэтыя змены былі зроблены па просьбе Канферэнцыі Каталіцкіх біскупаў Польшчы. 15 студзеня 2014 Канферэнцыя Каталіцкіх біскупаў Польшчы скіравала ліст да Кангрэгацыі Божага Культу і Дысцыпліны Сакрамэнтаў з просьбаю, каб у Ларэтанскай Літаніі пасля закліку «Маці ласкі Божай», можна было дадаць заклік «Маці Міласэрнасці». 8 лістапада 2014 года Кангрэгацыя ахвотна задаволіла просьбу. Тэрмін «litania» (гр. lite, лац. litanea — просьба, маленне, выпрошванне) даслоўна азначае малітоўнае выпрошванне. Ад іншых малітоўных выпрошванняў гэта літанія адрозніваецца спецыфічнаю структураю: яна складаецца з мноства заклікаў-просьбаў, пасля якіх гаворыцца адказ, напр., «маліся за нас» — у Літаніі да Найсвяцейшай Панны Марыі і Літаніі да ўсіх святых, а калі звяртаемся да Хрыста або іншых Боскіх асобаў — «змілуйся над намі» або «выслухай нас, Пане». Літанія, вядомая як Ларэтанская, паходзіць ад назвы мястэчка Ларэта, размешчанага ў правінцыі Анкона ў Італіі, дзе знаходзіцца славуты Марыйны санктуарый. Паводле легенды, у ХІІІ ст. дамок з Назарэта, у якім нарадзілася Маці Божая, быў перанесены анёламі ў Ларэта. Вядома, што літанія асаблівым чынам прапагандавалася і чыталася пілігрымамі ў гэтым санктуарыі, дзе яна набыла канчатковую форму і пачала распаўсюджвацца ва ўсім Касцёле. У 1531 г. запісана сведчанне, у якім гаворыца аб чытанні літаніі ў гэтым санктуарыі. Упершыню яна была надрукаваная ў 1572 г. у Фларэнцыі і мела 43 заклікі. Да канца ХVI ст. яна перадрукоўвалася каля 20-ці разоў, што сведчыць пра яе даволі шырокае распаўсюджанне.
Напрыклад, даданне закліку «Успамога хрысціянаў» прыпісваецца Пію V у сувязі з перамогаю над туркамі пад Лепанто (1571); «Каралева, без граху першароднага зачатая» — Пію ІХ (1854); Леў ХІІІ увёў заклік «Каралева Ружанца святога» (1883) і «Маці добрай рады» (1903). Заклік «Каралева супакою» далучыў Бэнэдыкт ХV (1917), а папа Пій ХІІ — «Каралева ўнебаўзятая» (1950) з нагоды абвяшчэння догмату пра Унебаўзяцце Найсвяцейшай Панны Марыі; заклік «Маці Касцёла» дадаў Павел VІ падчас Другога Ватыканскага Сабору, а Ян Павел ІІ пакінуў права ўвядзення гэтага тытула ў літанію за Канферэнцыямі біскупаў (1980); Яну Паўлу ІІ мы абавязаны з’яўленнем тытула «Каралева сем’яў» (1995). Апрача дазволаў на паўсюднае ўвядзенне заклікаў, выдадзена шмат дазволаў, абмежаваных паасобнымі дыяцэзімі або манаскімі супольнасцямі. Такім чынам, францішкане атрымалі дазвол на змяшчэнне (апошні зварот) уласнага закліку «Каралева, серафіцкага ордэну» (1910), а кармэліты з 1689 года выкарыстоўваюць заклік «Каралева святога шкаплера». Пераклад з польскай Іны Бігель Паводле ave-maria.by
|