Арцыбіскуп Макшыцкі пракаментаваў сустрэчу Папы з Уладзімірам Пуціным |
15.06.2015 12:20 |
Арцыбіскуп доўгі час быў другім сакратаром Папы Яна Паўла ІІ і добра знаёмы з ватыканскай дыпламатыяй. «Адкрытасць Касцёла да сустрэчы з кіраўнікамі розных дзяржаў, нават тых, якія ваююць, мае вельмі вялікае значэнне. Святы Айцец такім чынам заўсёды мае магчымасць выказаць свае погляды на мір, дэмакратыю, права на свабоду. І нагадаю, што кожная сустрэча наступніка Пятра з якім заўгодна прэзідэнтам можа паўплываць на тых асобаў, якія сустракаюцца са Святым Айцом», - кажа арцыбіскуп Макшыцкі. Іерарх нагадаў, што Уладзімір Пуцін некалькі разоў сустракаўся з Папам Янам Паўлам ІІ, і пратакол такіх сустрэч заўсёды прадугледжвае абмен падарункамі на памяць. «Святы Айцец заўсёды даруе нейкі абраз, ікону, выяву якой-небудзь біблійнай сцэны... Медальён (які Папа падараваў Пуціну) - гэта не ўзнагарода, не афіцыйная адзнака ад Ватыкана. Гэта звычайны маленькі сціплы падарунак. І ў дадзеным выпадку гэта быў медальён святога Арханёла Міхала, які з'яўляецца апекуном міру, і менавіта ў такой інтэнцыі - дасягнення міру - Папа і падараваў гэты медальён», - распавёў іерарх. Таксама Папа меў нагоду звярнуцца да сумлення суразмоўцы, казаць пра хрысціянскія каштоўнасці, звярнуцца да яго з заклікам да міру, заявіць, што кожны мае права на жыццё, свабоду і мір, сказаў арцыбіскуп Макшыцкі. «Мы заўсёды як хрысціяне молімся не толькі за нашых сяброў, родных, нашу краіну, але і за ворагаў, за няверуючых, каб яны навярнуліся, змянілі свае думкі і ўчынкі. Згадаем, што Хрыстус заклікаў нас да такой малітвы нават за ворагаў», - пракаментаваў іерарх словы Папы аб малітве за Прэзідэнта Пуціна. «Калі б не было падобных сустрэч, то Папа не меў бы магчымасці ўплываць на сітуацыю ў свеце. Але ягоная роля - уплываць і рабіць усё магчымае для дасягнення міру», - падсумаваў Старшыня епіскапату Украіны. Паводле інфармацыі прэс-службы Львоўскай архідыяцэзіі Рыма-Каталіцкага Касцёла (АлГ) |