Заклапочанасць хрысціян выклікае ў першую чаргу павелічэнне дзяржаўнага ўмяшальніцтва ў рэлігійнае жыццё в’етнамцаў. 

Як інфармуе Каталіцкае інфармацыйнае агенцтва Польшчы, у новым законапраекце, у прыватнасці, патрабуецца рэгістраваць усе рэлігійныя групы, якія ў адваротным выпадку будуць лічыцца незаконнымі. Падобны закон ужо дзейнічае ў Кітаі.

«Калі гэты закон уступіць у сілу, гэта будзе крокам назад», — сказаў арцыбіскуп Леапольда Джырэлі, часовы прадстаўнік Ватыкана ў гэтай краіне.

 

У маі 2015 года біскупы В’етнама выступілі з рэзкім лістом да ўрада краіны. Яны выказалі заклапочанасць наконт планаў камуністычнага рэжыму, які «навязвае свой аўтарытэт у рэлігійных арганізацыях і стварае небяспечную магчымасць злоўжывання». Паводле меркавання назіральнікаў, новы закон можа справакаваць пагаршэнне свабоды веравызнання ў краіне.

Католікі В’етнама складаюць амаль 7 працэнтаў усіх жыхароў краіны, 45 працэнтаў в’етнамцаў практыкуюць мясцовыя рэлігіі, 12 працэнтаў — будысты.

(ils)