Упершыню ў гісторыі Папскага ўніверсітэта ў Саламанцы (Іспанія) яго рэктарам стаў свецкі чалавек і жанчына – 51-гадовая прафесар Мірыям Картэс, спецыяліст па кананічным праве і маці чатырох дзяцей.

Прафесар Мірыям Картэс паходзіць з Орэнсэ. Вывучала грамадзянскае і кананічнае права ў Санцьяга дэ Кампастэла і Саламанцы, дзе ў 1998 годзе атрымала доктарскую ступень. З таго часу яе дзейнасць была звязана з Папскім універсітэтам у гэтым горадзе. Гэта першая свецкая асоба і жанчына, якая стала дэканам факультэта кананічнага права (2004-2010).

Прафесар з'яўляецца таксама першай жанчынай, якая заняла пасаду Генеральнага сакратара ўніверсітэта (2011-2013). Яна мае багаты навуковы набытак.

Паводле статуту ўніверсітэта яе кандыдатура на выкананне рэктарскіх абавязкаў была прадстаўлена Сталай Радзе епіскапату Іспаніі, якой падначальваецца ўніверсітэт. Пасля атрымання пазітыўнага меркавання, Кангрэгацыя Каталіцкай Адукацыі прызначыла прафесара Картэс рэктарам гэтай навучальнай установы.

Паводле польскай рэдакцыі Ватыканскага радыё

(AYU)