Ліхвяры, якія патрабуюць празмерныя працэнты па кароткатэрміновых крэдытах, атрымалі новага праціўніка — каталіцкіх біскупаў.

«Здаецца, кожны тыдзень той ці іншы мой парафіянін распавядае мне жахлівую гісторыю пра такія крэдыты. Яны калечаць нашы сем'і. Людзі бяруць крэдыты, цалкам не разумеючы ўмоваў, у выніку трапляючы ў даўгавую варонку, якая знішчае жыцці шматлікіх сем'яў. Гэта павінна скончыцца», — адзначыў айцец Дэніэл Келлі, пробашч парафіі Святога Юзафа ў Арлінгтоне.

Каталіцкія біскупы, якія з'яўляюцца сталымі сябрамі Каталіцкай канферэнцыі Тэхаса, заклікаюць змагацца супраць кампаній і банкаў, якія прапануюць кораткатэрміновыя крэдыты пад празмерна высокія працэнты.

Пратэрміноўкі па такіх крэдытах прыводзяць да празмерных дадатковых выплат па працэнтах, у выніку чаго людзі працуюць толькі для таго, каб выплачваць пазыкі.

Каталіцкая канферэнцыя Тэхаса арганізуе публічныя прэзентацыі, падчас якіх распавядае людзям пра небяспеку такіх крэдытаў і патрэбу рэформаў.

«Езус перакуліў сталы ў Храме ў гневе на гандляроў... Таму для ўдзелу Касцёла ў гэтым ёсць біблейскія прычыны, і ў Старым Запавеце таксама ёсць словы супраць ліхвярства», — кажа Джэніфер Олмон, адна з дырэктараў Каталіцкай канферэнцыі Тэхаса.

Аляксандр Гелагаеў паводле catholicnewsagency.com