Баевікі «Ісламскай дзяржавы» цалкам разбурылі найстаражытнейшы ў Іраку хрысціянскі манастыр святога Ільі на ўскраіне горада Масул на поўначы краіны.

Пра гэта сведчаць здымкі са спадарожніка, якія кампанія DigitalGlobe падрыхтавала па запыце агенцтва The Associated Press, перадае РБК.

Кампанія падала два здымкі: на першым з іх, зробленым 31 сакавіка 2011 г., выразна бачны сцены манастыра. На другім фота, датаваным 28 верасня 2014 года — на месцы манастыра бачны толькі руіны.

Здымкі пацвярджаюць тое, чаго асцерагаліся царкоўныя лідары і абаронцы помнікаў на Блізкім Усходзе — манастыр ператварыўся ў гару абломкаў і стаў яшчэ адной ахвярай дзеянняў ісламістаў.

Манастыр святога Ільі быў месцам пакланення хрысціян на працягу 1400 гадоў. У апошні час, падчас аперацыі ў Іраку, туды прыходзілі амерыканскія вайскоўцы. І хоць стан будынку быў вельмі дрэнным (у прыватнасці адсутнічаў дах, на частках сцен з’явіліся расколіны), у манастыры было 26 унікальных памяшканняў, у тым ліку капліца і алтар.

«Каменныя сцены былі літаральна ператвораны ў пыл», — сказаў фотоаналітык Стывен Вуд, паглядзеўшы спадарожнікавыя здымкі. Паводле яго слоў, тэрарысты маглі выкарыстоўваць для разбурэння манастыра бульдозеры, цяжкую тэхніку, кувалды і, магчыма, выбухоўку.

Іншы суразмоўца, каталіцкі святар у Іраку Пол Табіт Хабіб, расцаніў знішчэнне святыні як спробу «Ісламскай дзяржавы» выціснуць хрысціянства з Ірака. «Гісторыя хрысціянства ў Масуле па-варварску зраўняна з зямлёй», — заявіў святар.

Манастыр святога Ільі папоўніў спіс з больш чым 100 гістарычных і рэлігійных помнікаў, якія былі разбураны тэрарыстамі «Ісламскай дзяржавы» з часоў заснавання групоўкі. Найбольшую вядомасць атрымала знішчэнне антычнага горада Пальміра ў Сірыі, які быў аб'ектам сусветнай спадчыны ЮНЕСКА. Тэрарысты занялі Пальміру ў маі 2015 года і знішчалі руіны па частках. У кастрычніку была падарвана Трыумфальная арка Пальміра, якая лічылася сімвалам антычнага горада.

Паводле risu.org.ua, (AYU)