Чарговыя футбольныя клубы падтрымалі праект супрацоўніцтва школ, ініцыятарам якога выступіў Папа Францішак. Футбалісты «River Plate» і «Boca Juniors», аргенцінскіх клубаў першай лігі, перад нядзельным матчам у Буэнас-Айрэсе пасадзілі аліўкавае дрэва, якое з’яўляецца сімвалам праекту.

Ініцыятыва нарадзілася ў Аргенціне і пазней атрымала назву «Scholas occurrentes». Папа Францішак яшчэ перад сваім абраннем на Пасад святога Пятра развіваў у архідыяцэзіі Буэнас-Айрэса праект супрацоўніцтва паміж школамі на ўзроўні спартыўных і дабрачынных ініцыятыў.

Ідэя заснавана на супрацоўніцтве школ з усяго свету ў рэалізацыі сумесных праектаў. Навучальныя ўстановы павінны ўзаемаўзбагачацца, будаваць атмасферу ўзаемнай павагі паміж рознымі народамі і культурамі, а таксама садзейнічаць адукацыі дзяцей з сем’яў з нізкім узроўнем даходу.

Першыя замежныя школы былі ўключаны ў праект «Scholas occurrentes» у 2013 годзе падчас канферэнцыі ў Папскай акадэміі навук. Папа Францішак у той час сустрэўся з прадстаўнікамі сусветнага футболу, у тым ліку з добра вядомымі футбалістамі і трэнерамі з Аргенціны і Італіі. Капітаны зборных абедзвюх краін Ліянэль Месі і Джанлуіджы Буфон пасадзілі ў той день аліўкавае дрэва, якое і стала сімвалам міжнароднай сеткі школ.

Ліянэль Месі і Джанлуіджы Буфон перадаюць аліўкавае дрэва Пантыфіку.

Афіцыйна «Scholas occurrentes» мае статут Міжнароднай арганізацыі Пантыфікальнага права, бо атрымала афіцыйную падтрымку Святога Пасаду. Зараз арганізацыя існуе ў 82 краінах і аб'ядноўвае больш за 400 тысяч розных навучальных устаноў.

Аляксандр Гелагаеў паводле беларускай рэдакцыі Ватыканскага радыё і Scholasoccurrentes.org