«An Leabhar Aifrinn Rómhánach» будзе служыць тым, хто цэлебруе святую Імшу на ірландскай мове, а таксама дапаможа захаваць родную мову «зялёнай выспы» як жывую мову набажэнства.

Канферэнцыя Каталіцкіх Біскупаў Ірландыі абвясціла пра публікацыю ў 2016 годзе алтарнага выдання Рымскага Імшала на ірландскай мове — «An Leabhar Aifrinn Rómhánach».

Аб'ява прымеркавана да тыдня ірландскай мовы, які праводзіцца ў краіне кожны год перад Днём святога Патрыка — 17 сакавіка.

«Гэта значная падзея не толькі для Касцёла ў Ірландыі, але і для ўсіх, хто любіць нашу культуру і спадчыну, асабліва ірландскую мову. Мы такія, як мы молімся. Калі мы молімся Богу, Ён змяняе і абнаўляе нас, каб мы былі больш жывымі», — сказаў старшыня Рады па літургіі Канферэнцыі Каталіцкіх Біскупаў Ірландыі біскуп Марцін Дрэнан.

Моўныя праблемы ў Ірландыі ў чымсьці нагадваюць беларускія — ёсць дзве дзяржаўныя мовы, але найбольш часта выкарыстоўваецца не родная мова мясцовага насельніцтва, а чужая, у выпадку Ірландыі — англійская.

«Вітай, Марыя» на ірландскай мове.

Сітуацыя ў Ірландыі ўскладняецца тым, што англійская мова належыць да германскай моўнай групы, а ірландская — да кельцкай, з-за чаго англамоўным ірландцам куды цяжэй, чым рускамоўным беларусам, вяртацца да роднай мовы.

Аляксандр Гелагаеў паводле Zenit.org