Яшчэ ў 2007 годзе Канферэнцыя Каталіцкіх Біскупаў ЗША прыняла дакумент «Фармацыя свядомасці верніка-грамадзяніна». У ім іерархі не дыктуюць, за якую партыю ці кандыдата католік павінен галасаваць, аднак агучваюць прынцыпы, якімі вернік павінен кіравацца пры выбары.

Зараз Рэспубліканская партыя ЗША праводзіць праймерыз — выбары свайго кандыдата, які будзе потым спаборнічаць з кандыдатам ад Дэмакратычнай партыі. Лідарам на рэспубліканскіх праймерыз зараз з'яўляецца мільярдэр Дональд Трамп, і многія католікі сумняюцца, што галасаванне за яго будзе разумным і маральным варыянтам.

У пачатку сакавіка некалькі дзясяткаў каталіцкіх інтэлектуалаў назвалі Трампа «абсалютна непадыходзячым для пасады прэзідэнта Злучаных Штатаў».

«Ягоная кампанія ўжо абваліла нашую палітыку на новыя глыбіні вульгарнасці. Звароты да расавых і этнічных страхаў і прадузятасцяў зневажаюць любыя сапраўды каталіцкія адчуванні. Ён абяцаў загадваць амерыканскім вайскоўцам катаваць падазраваных тэрарыстаў і забіваць сем'і тэрарыстаў, што супярэчыць прынцыпам Касцёла і зганьбіць нашу краіну», — гаворыцца ў звароце католікаў.

«Нішто ў ягонай кампаніі ці папярэдняй гісторыі паводзінаў не дае прычын думаць, што ён сапраўды падзяляе нашу адданасць праву на жыццё, на свабоду рэлігіі і сумлення, што ён гатовы аднаўляць культуру шлюбу», — кажуць католікі з розных універсітэтаў і хрысціянскіх арганізацый.

Прэтэнзіі да кандыдатаў ад Дэмакратычнай партыі не выказваліся, бо і так вядома, што Хілары Клінтан і Берні Сандэрс выступаюць супраць права на жыццё — падтрымліваюць аборты.

У дакуменце «Фармацыя свядомасці верніка-грамадзяніна» амерыканскія біскупы пішуць, што права на жыццё — вызначальнае пытанне для выбаршчыка-католіка. Папа Ян Павел ІІ называў яго «першасным і самым сутнасным, перадумовай усіх астатніх правоў асобы».

Іерархі Касцёла ў ЗША пішуць, што свядомае знішчэнне нявіннага жыцця «не проста адна з праблем сярод іншых»: «супраць гэтага трэба змагацца заўсёды».

Галоўны канкурэнт Трампа сярод рэспубліканцаў — Тэд Круз.

«Калі кандыдат падтрымлівае легальнасць абортаў ці эўтаназію, католік павінен цвёрда разумець, што гэта супярэчыць вучэнню Касцёла, і ён не павінен галасаваць за такога кандыдата», — адзначае прафесар тэалогіі Каталіцкага ўніверсітэта Амерыкі доктар Чад Пекнальд.

Таксама іерархі звяртаюць увагу на іншыя пытанні:

«Расізм і іншая несправядлівая дыскрымінацыя, смяротнае пакаранне, несправядлівая вайна, выкарыстанне катаванняў, ваенныя злачынствы, адмова ў дапамозе галодным ці тым, хто патрабуе медыцынскай дапамогі, парнаграфія, перакручванне грамадзянскага шлюбу, напады на свабоду веравызнання ці несправядлівая іміграцыйная палітыка — гэта сур'ёзныя маральныя праблемы, якія кідаюць выклік нашай свядомасці і патрабуюць ад нас дзеянняў».

Кандыдаты ад Дэмакратычнай партыі — Берні Сандэрс і Хілары Клінтан.

Католікі могуць мець розныя меркаванні наконт таго, якім чынам «больш эфектыўна змагацца з гэтымі і іншымі важнымі пагрозамі чалавечаму жыццю і годнасці», аднак вернікі павінны «сур'ёзна ставіцца да вучэння Касцёла ў гэтай сферы».

У тым выпадку, калі ўсе наяўныя кандыдаты патрымліваюць пазіцыі, якія несумяшчальныя з вучэннем Касцёла, католік, згодна з «Фармацыяй свядомасці верніка-грамадзяніна», можа байкатаваць выбары ці вельмі сур'ёзна задумацца, які з кандыдатаў прынясе краіне менш шкоды.

Аляксандр Гелагаеў паводле Catholicnewsagency.com, Usccb.org