Росту ў значнай меры спрыялі Іран, Пакістан і Саудаўская Аравія. На гэтыя краіны прыходзіцца 89 працэнтаў выпадкаў прымянення вышэйшай меры пакарання.

Міжнародная праваабарончая арганізацыя Amnesty International канстатуе, што 2015 год стаў рэкордным па колькасці смяротных прысудаў за апошнія 25 гадоў.

Паводле падлікаў арганізацыі, у 2015 годзе смяротная кара была прыменена больш чым да 1,6 тысяч чалавек, што на 573 чалавекі больш, чым у мінулым годзе. Колькасць смяротных прысудаў павялічылася больш чым у два разы. У гэтую статыстыку не трапіў Кітай, дзе лічбы аб смяротных прысудах лічацца дзяржаўнай таямніцай.

Краіны і лічбы

Паводле слоў генеральнага сакратара Amnesty International Саліла Шэці, атрыманыя арганізацыяй даныя «выклікаюць глыбокую заклапочанасць».

«На шчасце, краіны, у якіх праводзяцца смяротныя пакаранні, належаць да... ізаляванай меншасці. Большасць краін адмовіліся ад смяротнага пакарання, і ў 2015 годзе яшчэ чатыры краіны цалкам выключылі гэтае варварскае пакаранне са сваіх заканадаўстваў», — адзначыў ён напярэдадні публікацыі даклада.

Ад смяротнага пакарання адмовіліся Фіджы, Мадагаскар, Рэспубліка Конга і Сурынам. У выніку цяпер «крайнія меры» не дзейнічаюць у 102 краінах.
У Пакістане ў 2015 годзе была пакарана рэкордная для гэтай краіны колькасць людзей — 320, у Іране — 977. У Саудаўскай Аравіі смяротныя прысуды былі выкананы над 158 асобамі. Павялічылася колькасць пакаранняў у Егіпце і Самалі.

«Пяць краін, якія здзейснілі самую вялікую колькасць прысудаў у 2015 годзе, — гэта Кітай, Іран, Пакістан, Саудаўская Аравія і ЗША, менавіта ў такім парадку», — адзначаецца ў дакладзе.

«У ЗША было здзейснена 28 прысудаў, самая вялікая колькасць з 1991 года. Штат Пенсільванія ўвёў мараторый на смяротнае пакаранне, і цяпер у цэлым 18 штатаў ЗША цалкам забаранілі смяротную кару», — адзначаецца ў дакуменце.

Беларусь застаецца адзінай краінай у Еўропе, у якой захоўваецца смяротнае пакаранне.

Паводле РИА Новости (IL)