Маскоўскі Патрыярхат і Рыма-Каталіцкі Касцёл у Расіі будуць разам садзейнічаць аднаўленню хрысціянскіх святыняў у Сірыі.

«У якасці адной з першапачатковых задач на бліжэйшы час прызнана неабходнасць складання дэталізаванага спісу знішчаных падчас вайны ў Сірыі хрысціянскіх святыняў — храмаў і кляштараў, а таксама ўзмацненне сумеснага сведчання хрысціян аб сірыйскай трагедыі», — паведамляе сайт сінадальнага Аддзела знешніх царкоўных сувязяў Маскоўскага Патрыярхату па выніках паездкі дэлегацыі Рускай Праваслаўнай Царквы і Каталіцкага Касцёла ў Сірыю і Ліван.

У склад дэлегацыі ўвайшлі ардынарый каталіцкай архідыяцэзіі Маці Божай у Маскве арцыбіскуп Паоло Пеццы, сакратар АЗЦС па міжхрысціянскіх зносінах іераманах Стэфан Ігумнаў, прадстаўнікі міжнароднага каталіцкага фонду «Дапамога Касцёлу ў патрэбе».

Прадстаўнікі Рускай Праваслаўнай Царквы і Каталіцкага Касцёла правялі кансультацыі з лідарамі мясцовых канфесій, пабывалі ў месцах часовага прабывання бежанцаў.

Айцец Стэфан у размове з карэспандэнтам «Интерфакс» назваў беспрэцэдэнтным той факт, што Руская Праваслаўная Царква і Рыма-Каталіцкі Касцёл «сумесна ініцыявалі праект, які аб’ядноўвае хрысціян з Блізкага Усходу для вырашэння практычных гуманітарных задач».

«Гэта, безумоўна, з’яўляецца вынікам дамоўленасцяў, заключаных у Гаване», — заявіў субяседнік агенцтва.

Таксама іераманах адзначыў, што аднаўленне хрысціянскіх святыняў у Сірыі — вельмі маштабная праблема, якая патрабуе ўдзелу сусветнага грамадства.

«Для таго, каб сірыйцы, у тым ліку хрысціяне, вярнуліся ў свае дамы, а гарады ізноў сталі жыць паўнацэнным жыццём, патрэбна аднавіць іх святыні. Пасля заканчэння вайны гэта павінна стаць адной з першапачатковых задач, і ўжо зараз патрэбна падрыхтаваць глебу для яе вырашэння», — дадаў іераманах Стэфан.

Паводле «Интерфакс»,

(MV)