«Захаваць высокія каштоўнасці дэмакратычнага суіснавання, павагі да бліжняга, цярпімасці і здаровага плюралізму» заклікала бразільцаў Канферэнцыя Каталіцкіх Біскупаў краіны на фоне палітычнага крызісу, які прывёў да імпічменту Прэзідэнту.

«Наяўны крызіс паказвае неабходнасць сапраўднай і глыбокай палітычнай рэформы», — лічаць іерархі і абяцаюць назіраць за выкананнем закону падчас крызісу.

Парламент Бразіліі прагаласаваў за імпічмент Прэзідэнту Бразіліі Дзілме Русеф, якую абвінавацілі ў маніпуляванні дзяржаўнымі грашыма. Яна адмаўляе гэтыя абвінавачванні і называе тое, што адбылося, канстытуцыйным пераваротам.

«[Патрэбна] забяспечыць эфектыўны ўдзел грамадства ў дзяржаўных справах, развіваць незалежнасць розных галінаў улады, аднавіць давер да дзяржаўных інстытутаў і забяспечыць сацыяльныя правы людзей», — заявілі каталіцкія іерархі Бразіліі.

Аляксандр Гелагаеў паводле catholicculture.org, premier.org.uk