Біскупы Англіі і Уэльса прынялі рэзалюцыю, якая заклікае католікаў маліцца і думаць, наколькі рашэнне аб выхадзе краіны з Еўрасаюза супадае ці супярэчыць агульнаму дабру, патрэбам слабых сяброў грамадства, годнасці чалавечай асобы.

«Рэферэндум — гэта магчымасць больш паразважаць пра гэтыя каштоўнасці, якія нам дарагія як нацыі і як католікам. Жыццёва важнымі падчас гэтага нацыянальнага абмеркавання будучыні нашай нацыі ў свеце з'яўляюцца ўзаемная павага і ветлівасць», — гаворыцца ў рэзалюцыі.

«Кожная асоба будзе мець уласныя погляды адносна найлепшай палітычнай сістэмы, у якой можа рэалізаваць гэтыя ідэалы», — адзначылі іерархі.

«Мы прызнаём, што многія людзі апраўдана занепакоеныя сяброўствам Вялікабрытаніі ў Еўрапейскім Саюзе, ягонымі інстытутамі і наступствамі паглыбленай інтэграцыі», — заявілі біскупы.

Рэферэндум па пытанні аб сяброўстве Вялікабрытаніі ў ЕС адбудзецца 23 чэрвеня.

Паводле catholicculture.org (АлГ)