Іспанскі вандроўнік і заваёўнік Эрнан дэ Сота ўсталяваў драўляны крыж у індзейскай вёсцы ў 1541 годзе, і археолагі думаюць, што знайшлі сляды гэтай гістарычнай падзеі.

Вучоныя Універсітэта Арканзаса на гэтым тыдні працуюць на месцы былога індзейскага паселішча Каскві, якое знаходзіцца на тэрыторыі археалагічнага парка ў паўночнаўсходняй частцы амерыканскага штата.

Дэ Сота і яго атрад высадзіліся з караблёў у Флорыдзе ў 1539 годзе. Яны тры гады вандравалі, то сябруючы, то ваюючы з рознымі плямёнамі індзейцаў, і сталі першымі еўрапейцамі, якія перайшлі раку Місісіпі.

Вядома, што канкістадор паставіў вялікі драўляны крыж 4 ліпеня 1541 года — і камбінацыя розных метадаў датавання знойдзенага драўлянага слупа якраз трапляе на 1541.

Побач знойдзены парэшткі керамічнага посуду індзейцаў.

Згодна з іспанскімі гістарычнымі дакументамі, індзейская вёска Каскві, калі яе знайшлі канкістадоры, пакутвала ад доўгай засухі і папрасіла дапамогі ў «еўрапейскага Бога».

Разам з атрадам дэ Сота ішлі прыкладна дзесяць святароў з Дамініканскага ордэна. Майстар-іспанец знайшоў «самае высокае і роўнае дрэва» для крыжа, а святары яго асвяцілі. Потым прыкладна дзве тысячы індзейцаў прысутнічалі на святой Імшы, якую адправілі на гэтым месцы.

Аляксандр Гелагаеў паводле Archaeologicalconservancy.org