Ісламскі ўніверсітэт Аль-Азхар у Каіры і праваслаўны Копцкі Патрыярхат падпісалі пагадненне, у якім былі закрануты прынцыпы, якія тычацца абароны дзяцей ад сексуальнай эксплуатацыі.

Пад эгідай ЮНІСЕФ, фонду ААН па абароне правоў дзяцей, сумесны дакумент быў падпісаны Патрыярхам Тавадрасам II і вялікім імамам універсітэта шэйхам Ахмедам аль-Тайібам.

Тэкст падкрэслівае абарону непаўналетніх як агульную каштоўнасць веры мусульман і хрысціян.

У дадатак да барацьбы з сексуальным гвалтам сярод мэтаў кампаніі па абароне дзяцей таксама ўзгадваецца адмова ад прымусовых шлюбаў непаўналетніх і генітальнага акалечвання жанчын.

Гэтая дэкларацыя прадугледжвае супрацоўніцтва 850 імамаў, святароў, манахаў і пастырскіх работнікаў. Яны будуць падрыхтаваны да працы ў межах спецыяльных курсаў, каб маглі папярэджваць сваіх суграмадзян аб парушэннях, якія адбываюцца вакол іх.

Падставай для арганізацыі кампаніі з’яўляецца рэзкае павелічэнне колькасці выпадкаў сексуальнага гвалту ў дачыненні да непаўналетніх у Егіпце.

Паводле Deon.pl,

(MV)