У мінулым годзе колькасць ахвяр узброеных канфліктаў ва ўсім свеце стала самай высокай за апошнія 25 гадоў, а колькасць бежанцаў дасягнула максімуму з часоў Другой сусветнай вайны.

Пра гэта са спасылкай на даныя Глабальнага індэкса міру паведамляе руская служба BBC.

Рэзкі рост гвалту ў свеце адбываецца ў першую чаргу з-за канфліктаў на Блізкім Усходзе. Самай небяспечнай для жыцця краінай прызнана Сірыя, за ёй ідуць Паўднёвы Судан, Ірак, Афганістан і Самалі.

Паводле даных Global Peace Index, лік тэрарыстычных нападаў за мінулы год таксама стаў рэкордным за ўвесь час назіранняў, большая частка атак адбылася ў пяці краінах: у Сірыі, Іраку, Нігерыі, Афганістане і Пакістане.

 

Еўропа застаецца самым мірным рэгіёнам на планеце, аднак спецыялісты адзначаюць, што за апошнія пяць гадоў колькасць тэрарыстычных атак у еўрапейскіх краінах рэзка павялічылася.

 

Пры складанні рэйтынгу ўлічваюцца 23 фактары, у лік якіх уваходзяць як унутраныя — напрыклад, узровень гвалту і злачыннасці ў краіне, — так і знешнія, у тым ліку адносіны з суседнімі краінамі і ўзровень ваенных выдаткаў.

 

Паводле baltnews.lt , (IL)