Узяць свае мабільныя тэлефоны ці відэакамеры і дасылаць кароткія відэа, з якіх будзе кожны дзень стварацца дакументальны фільм пра Сусветныя дні моладзі, запрашаюць стваральнікі праекта.

Пілігрымка пачынаецца ва ўсіх канцах свету, але заканчваецца ў Кракаве сустрэчай са Святым Айцом. Моманты радасці, разважання, малітвы ці суму, цікавыя выпадкі падчас падарожжа пілігрымаў — усё гэта можа стаць часткай вялікай гісторыі, калі мець з сабой адпаведны гаджэт.

«Вы можаце здымаць пра ўсё, што сустрэнецца вам па дарозе, пачынаючы з моманту адпраўлення рэгістрацыі і да 1 жніўня», — паведамляе спецыяльны сайт triptocracow.org.pl.

Фільм будзе інтэрактыўным, кожны дзень новым — бо кожны дзень чакаюцца новыя ўдзельнікі і запісы.

Матывуючы ролік праекта.

«Мы чакаем 2-3 запісы кожны дзень ад кожнага ўдзельніка праекта, аднак будзем вельмі рады атрымліваць і больш», — гаворыцца на сайце.

Медыяпартнёр праекта — польскі канал TVP Historia.

Са свайго боку Catholic.by будзе рады інфармацыі пра ролікі з удзелам беларускіх пілігрымаў.

Аляксандр Гелагаеў