Міколу Быстрыцкаму 26 гадоў, ён толькі што стаў дыяканам пасля вучобы ў гарадоцкай семінарыі Святога Духа ва Украіне. Да семінарыі ён граў у гурце «Мартові», працягнуў творчую дзейнасць і пасля паступлення.

«Гэта ідэя пробашча парафіі ў Бары а. Рамана Пархомцава. Спачатку планавалася "візітоўка" групы моладзі з Бара, якая збіралася на СДМ у Кракаў», — распавядае Мікола Быстрыцкі.

Разам з дыяканам Міколай над запісам працаваў парафіянін з Бара музыкант Павел Малы, які рабіў аранжыроўку.

Планавалася выпусціць відэакліп, аднак часу на відэа не хапіла, і застаўся толькі трэк да яго — аўтарскі варыянт гімна «Шчаслівыя міласэрныя». Атрымалася не кавер-версія, а новая мелодыя, з арыгіналу былі ўзяты толькі словы.

«Чаму гэтая версія ўвогуле паўстала? Таму што існуе патрэба, якая застаецца без адказу. Маладыя людзі, у тым ліку вельмі таленавітыя музыканты з велізарным патэнцыялам, часта адчуваюць, што ў Касцёле для іх быццам бы няма месца як для музыкантаў, стваральнікаў новага. Такое ўражанне, што іх месца — пастаяць пад хорамі на Імшы, прыйсці на моладзевую катэхезу, а потым вяртацца дадому і жыць іншым жыццём», — кажа Мікола.

«Я думаю, што гэта няправільна, бо ў Касцёле кожны мае сваё месца і асаблівую місію. З гэтым згодны і Павел, які са мной працаваў над запісам», — дадае дыякан.

У мінулым годзе Мікола Быстрыцкі сыграў лірычную песню «Не пішы», тэма якой — адказнасць у сваім штодзённым жыцці перад Богам і бліжнімі.

Credo-ua.org (АлГ)