Католікі і праваслаўныя атлеты-алімпійцы кажуць пра сваю веру і асабістыя мэты ў Рыа-дэ-Жанейра.

Вядома, што колькасць хрысціянскіх спартсменаў, якія ўдзельнічаюць у Алімпіядзе, значна большая, у тым ліку ёсць вернікі ў беларускай камандзе, але з ліку замежнікаў прапануем выказванні гэтых сямі маладых людзей, якія высока трымаюць свае нацыянальныя сцягі.

Дэвід Боўдзіа, 27-гадовы амерыканскі нырэц, які заваяваў залаты медаль на мінулай Алімпіядзе, католік:

«Перад кожным спаборніцтвам слухаю адну і тую ж песню і малітву. Я падыходжу да спаборніцтваў і рэлігійных практык аднолькава. Я знаходжу мір, калі я раблю гэтыя рэчы, раблю іх для Бога і Ягонай славы».

Сімон Байлз — амерыканская гімнастка, трохразовая чэмпіёнка свету:

«Мая мама дала мне ў касцёле ружанец. Звычайна я не малюся на ім перад спаборніцтвамі, я малюся як звычайна, але бяру яго з сабой на ўсялякі выпадак».

Новак Джокавіч, сербскі тэнісіст, першая ракетка свету па версіі АТР, праваслаўны:

«Я веру ў Бога і малюся, дзякуючы, кожны дзень».

Кейці Ледэцкі — плыўчыха і двухразовая алімпійская чэмпіёнка:

«Каталіцкая вера для мяне вельмі важная, заўсёды была і будзе такой. Гэта частка маёй асобы, і мая вера прыносіць мне спакой, дапамагае аб'ектыўна глядзець на свет. Я прамаўляю малітву ці дзве перад любым заплывам. "Вітай, Марыя" — вельмі прыгожая малітва, і яна супакойвае мяне».  

Хуан-Марцін дэль Потра — аргентынскі тэнісіст — пра сустрэчу з Папам Францішкам у 2013 годзе:

«Гэта быў для мяне значны момант, магчыма, самы важны ў жыцці. Усе ведаюць, што я католік, і гэта была фантастычная магчымасць размаўляць з ім».

Усэйн Болт — спрынтэр з Ямайкі, мнагакратны залаты медаліст на алімпіядах і чэмпіянатах свету, католік:

«Я веру Бібліі, шаную Хрыста... З Богам усё магчыма».

Гэббі Дуглас — амерыканская гімнастка, чэмпіёнка 2012 года ў індывідуальным заліку:

«Бог даў мне гэты цудоўны талент, таму я хачу ўдзельнічаць і праславіць Божае імя».

Аляксандр Гелагаеў паводле Сatholicnewsagency.com, Сatholicherald.co.uk, Catholicnews.com