Лідар Саюза ісламскіх супольнасцяў у Італіі лічыць, што пасля легалізацыі аднаполых «шлюбаў» не засталося ніякіх прычын не ўводзіць у заходніх краінах палігамію.

«Калі размова пра грамадзянскія правы, тады палігамія — такое права. Мусульмане ж не падтрымліваюць гомасексуальныя саюзы, але жывуць у сістэме, якая іх дазваляе», — сказаў Хамза Пікарда.

Італьянскі ўрад раней выказаўся ў падтрымку так званых грамадзянскіх саюзаў паміж людзьмі аднаго полу, нягледзячы на крытыку з боку Каталіцкага Касцёла. Гэта дае парам гомасексуалістаў такія ж правы, як і сужэнцам у сапраўдным шлюбе, акрамя права ўсынаўлення.

Крыніца права для католікаў — не проста жаданне чыноўнікаў ці дэпутатаў, за якіх прагаласавала большасць насельніцтва; крыніца справядлівага закона — Бог, таму зусім не кожная пастанова, прынятая той ці іншай дзяржавай, мае права на існаванне. У некаторых выпадках католікі нават не маюць права падпарадкоўвацца законам, якія маюць відавочна антыхрысціянскія злачынныя наступствы.

«Ажыццяўленне ўлады маральна вымяраецца яе боскім паходжаннем, разумнай прыродай і спецыфічнымі мэтамі, якія яна сабе ставіць. Ніхто не мае права загадваць ці пастанаўляць тое, што несумяшчальна з чалавечай годнасцю і натуральным законам», — гаворыцца ў Катэхізісе Каталіцкага Касцёла.

Каталіцкі Касцёл лічыць шлюбам толькі саюз паміж адным мужчынам і адной жанчынай.

Палігамія, як і так званыя гомасексуальныя «шлюбы», па сваёй прыродзе несумяшчальныя з чалавечай годнасцю, нясуць адмоўныя наступствы як для дарослых, так і для дзяцей, якія выхоўваюцца ў такіх сем'ях.

Легалізацыя такіх з'яў прымушае хрысціян называць (напрыклад, у судзе) шлюбам такія з'явы, якія сапраўдным шлюбам не з'яўляюцца, значыць ісці супраць свайго сумлення.

Святы Пасад неаднаразова папярэджваў жанчын-каталічак супраць шлюбаў з мусульманамі ў сувязі з небяспекай апынуцца ў несапраўдным шлюбе, згубіць асабістую свабоду і сваю каталіцкую веру.

Адпаведныя рэкамендацыі ўтрымліваюцца, напрыклад, у дакуменце «Erga migrantes caritas Christi», які быў апублікаваны ў 2004 годзе.

Аляксандр Гелагаеў паводле Catholicherald.co.uk