За апошнія гады калумбійскі ўрад нанёс цяжкія паразы баевікам групоўкі FARC. Гэта прымусіла левых радыкалаў пагадзіцца на мірныя прапановы законных уладаў. Адным з удзельнікаў мірнага працэсу будзе Каталіцкі Касцёл, якога баевікі-камуністы заўсёды лічылі сваім ворагам.

Абодва бакі заявілі 25 жніўня, што дасягнулі «канчатковай і поўнай» згоды адносна спынення баявых дзеянняў і будуць разам імкнуцца да «трывалага міру» ў краіне.

У кастрычніку ўрад правядзе рэферэндум, на якім грамадзяне павінны прагаласаваць «за» ці «супраць» пагаднення з FARC. Пасля гэтага арганізацыя пачне вывад сваіх баевікоў з джунгляў і сховішчаў у гарах. Баевікі накіруюцца ў спецыяльныя лагеры для раззбраення, якія будуць знаходзіцца пад кантролем ААН.

Урад правядзе зямельную рэформу, правядзе меры па спыненні гандлю наркотыкамі, кантрабандай якіх FARC фінансавала сваю падпольную дзейнасць.

FARC расшыфроўваецца з іспанскай як «Рэвалюцыйныя ўзброеныя сілы Калумбіі». Гэтая арганізацыя, якую падтрымлівалі зброяй і фінансамі Савецкі Саюз і іншыя камуністычныя краіны, акрамя гандлю наркотыкамі вінаватая ў выкраданні людзей за выкуп, а таксама ў забойствах бяззбройных.

З гэтай прычыны не выключана, што вялікая частка калумбійцаў на рэферэндуме прагаласуе супраць міру з людзьмі, якіх лічаць злачынцамі.

Вайна, якая пачалася ў 1960-я гады, як лічыцца, забіла больш за 200 тысяч чалавек, яшчэ пяць мільёнаў былі вымушаны пакінуць свае дамы.

Аляксандр Гелагаеў паводле Сnn.com