Эканамічныя праблемы і грамадскія выклікі сталі дамінантнымі на сустрэчы прадстаўнікоў ураду Французскай Рэспублікі і Каталіцкага Касцёла ў гэтай краіне, якая прайшла 11 кастрычніка. Дзяржаўную дэлегацыю ўзначальваў прэм’ер міністр Мануэль Вальс, а з боку Касцёла — Апостальскі Нунцый арцыбіскуп Луіджы Вэнтура і кардынал Андрэ Вэн-Труа.

Пасяджэнне такога тыпу было ўжо дванаццатым у Францыі. Побач з індустрыяльнымі, адміністрацыйнымі і прававымі пытаннямі ўздымаліся таксама актуальныя праблемы, цікавыя для абодвух бакоў.

Між іншым, уздымалася тэма бяспекі і абароны хрысціянскіх святыняў. Абмяркоўвалася месца і роля рэлігіі ў грамадстве. Прадстаўнікі Каталіцкага Касцёла ўказалі на важнасць таго, каб грамадства разумела, што рэлігіі з’яўляюцца адным з фактараў грамадскага спакою. У чарговы раз іерархі выказалі перакананне, што грамадства, у выпадку выдалення рэлігіі з публічнай сферы, будзе пазбаўлена асноўных сацыяльных і грамадскіх рэгулятараў.

КАІ (VGr)