Сустрэча старшыні Аддзела знешніх царкоўных сувязяў Маскоўскага Патрыярхату Мітрапаліта Іларыёна з новым Апостальскім Нунцыем у Расійскай Федэрацыі арцыбіскупам Чэлесціно Мільёрэ прайшла 21 кастрычніка ў Маскве.

Мітрапаліт Валакамскі пажадаў нунцыю Божай дапамогі і поспехаў у адказнай дыпламатычнай місіі ў Расіі. Пры гэтым праваслаўны іерарх адзначыў, што ў апошнія гады ў Аддзела склаліся канструктыўныя адносіны з нунцыятурай у Маскве і з яе папярэднімі кіраўнікамі — арцыбіскупамі Антоніо Менніні і Іванам Юркавічам. Арцыбіскуп Мільёрэ ў сваю чаргу падкрэсліў гатоўнасць развіваць плённае супрацоўніцтва паміж двума знешнецаркоўнымі ведамствамі.

Нунцый высока ацаніў гістарычную сустрэчу Папы Францішка і Патрыярха Кірыла, якая 12 лютага 2016 года адбылася ў Гаване і атрымала вялікі рэзананс у свеце.

Апостальскі Нунцый выказаў зацікаўленасць вопытам мірнага суіснавання хрысціян і мусульман у Расіі. Старшыня АЗЦС распавёў госцю пра станоўчыя прыклады ўзаемадзеяння прадстаўнікоў Царквы і ісламскіх абшчын, у тым ліку ў межах Міжрэлігійнай рады Расіі.

Арцыбіскуп Чэлесціно Мільёрэ нарадзіўся 1 ліпеня 1952 года ў П’емонце. Прэзбітэрскае пасвячэнне атрымаў 25 чэрвеня 1977 года. Абараніў доктарскую дысертацыю ў Папскім Латэранскім універсітэце ў Рыме. З 1980 года знаходзіцца на дыпламатычнай службе Святога Пасаду:

• 1980-1984 — працаваў у апостальскай дэлегацыі ў Анголе;
• 1984-1988 — пры Арганізацыі афрыканскіх дзяржаў;
• 1989-1990 — дарадчык Апостальскай Нунцыятуры ў Польшчы;
• 1992-1995 — пастаянны назіральнік Святога Пасаду пры Радзе Еўропы;
• 1995-2002 — субсакратар Аддзела па адносінах з дзяржавамі Дзяржсакратарыяту Святога Пасаду;
• 2002-2010 — пастаянны назіральнік Святога Пасаду пры ААН у Нью-Ёрку.
• У 2003 годзе з рук Яна Паўла ІІ атрымаў біскупскае пасвячэнне.
• З 30 чэрвеня 2010 года — Апостальскі Нунцый у Польшчы.
• З красавіка 2016 года — Апостальскі Нунцый у Расіі.

Паводле blagovest-info.ru
(VGr)