Выдавецтва айцоў францішканаў прэзентуе на кніжным кірмашы «Non/fiction» адну з самых папулярных кніг сярэднявечнай Еўропы — «Залатую легенду» а. Якуба Варагінскага.

Пра гэта паведаміў дырэктар культурнага цэнтра «Покровские ворота» Жан-Франсуа Ціры.

Твор італьянскага духоўнага пісьменніка айца дамініканіна Якуба Варагінскага, кананізаванага Каталіцкім Касцёлам, — гэта збор хрысціянскіх легенд і займальных жыццярысаў святых, які ў XIV-XVI стст. стаў самай папулярнай кнігай хрысціянскага Захаду пасля Бібліі.

У «Залатую легенду» ўваходзяць аповеды прыкладна пра 200 святых, уключаючы апакрыфічныя аповеды пра Дзеву Марыю і Езуса Хрыста.

Папулярнасць Legenda Aurea ў Сярэднявеччы была неверагоднай. Кніга ўваходзіла ў лік рукапісаў, якія найбольш перапісваліся, — да нашых дзён захавалася больш за тысячу копій.

Пасля з’яўлення кнігадрукавання ўжо да 1500 года было 74 лацінскія выданні, былі здзейснены пераклады на англійскую, французскую, італьянскую, нямецкую, іспанскую, галандскую, польскую і чэшскую мовы.

На рускай мове кніга выдаецца ўпершыню.

Паводле sib-catholic.ru
(VGr)