Албанскі мастак Самір Страці вырабіў партрэт святой Маці Тэрэзы з металічных скобаў для стэплера. Ідэя незвычайнай мазаікі паўстала, калі мастак усвядоміў, што палітыкі не ў стане вырашыць праблемы сірыйскіх бежанцаў.

«Я бачыў мноства падобных скобаў, якімі былі змацаваны шматлікія лістоўкі і газеты на саміце G-20. Але гэтыя дакументы так і не прынеслі міру і не палепшылі жыццё, — сказаў Страці. — Толькі гуманізм Маці Тэрэзы можа выратаваць бежанцаў».

Праца над партрэтам заняла менш за месяц. На мазаіку велічынёй у 10 квадратных метраў пайшло паўтара мільёна канцылярскіх скобаў белага і карычневага колераў.

Партрэт святой мастак падарыў Нацыянальнаму музею Косава ў Прышціне.

Самір Страці мае намер даслаць дакументы для ўнясення сваёй карціны ў Кнігу рэкордаў Гінеса. Гэта ўжо дзясятая яго праца з незвычайных матэрыялаў. Да гэтага ён выкарыстоўваў кававыя зярняты, коркі ад віна і зубачысткі.

Паводле gaudete.ru (IL)