4 ліпеня кардынал Жан-Луі Таран, старшыня Папскай рады па міжрэлігійным дыялогу, які прыбыў у якасці спецыяльнага легата Святога Айца Францішка на юбілейныя ўрачыстасці ў Будславе, сустрэўся з Мітрапалітам Мінскім і Слуцкім Філарэтам, Патрыяршым Экзархам усяе Беларусі. Сустрэча прайшла ў Мінскім Епархіяльным упраўленні.

У сустрэчы кардынала з кіраўніком Беларускай Праваслаўнай Царквы прымалі ўдзел Апостальскі Нунцый у Беларусі арцыбіскуп Клаўдыё Гуджэроцці, Мітрапаліт Мінска-Магілёўскі арцыбіскуп Тадэвуш Кандрусевіч, Кіраўнік справамі Беларускага Экзархату архіепіскап Навагрудскі і Лідскі Гурый, сакратар Мінскага Епархіяльнага ўпраўлення протаіерэй Мікалай Коржыч, кіраўнік аддзела адукацыі і катэхізацыі Мінскай епархіі протаіерэй Аляксандр Шымбалёў.

Як паведамляе афіцыйны партал Беларускай Праваслаўнай Царквы, падчас размовы кардынала з Мітрапалітам Філарэтам было, у прыватнасці, закранута пытанне дзяржаўна-царкоўных адносін у Беларусі. Легат адзначыў, што бачыць добрую волю беларускіх уладаў і асабіста Прэзідэнта да ўзаемавыгаднага супрацоўніцтва з канфесіямі. Суразмоўцы абмеркавалі таксама стан і перспектывы дыялога Каталіцкага Касцёла і Рускай Праваслаўнай Царквы.

Мітрапаліт Філарэт праз кардынала Жана-Луі Тарана перадаў Святому Айцу Францішку падарунак — факсімільную копію Слуцкага Евангелля, помніка кніжнай культуры XVI стагоддзя.

Для кардынала Тарана была праведзена экскурсія па Епархіяльным упраўленні. Высокаму госцю распавялі гісторыю Мінскай архіерэйскай кафедры.

Таксама папскі легат наведаў дамовы храм Епархіяльнага ўпраўлення ў гонар Сабору Беларускіх святых.

Раней у гэты дзень адбылася сустрэча кардынала з Прэзідэнтам Беларусі Аляксандрам Лукашэнкам.

(AG)