У межах свайго візіту ў Ватыкан 21 мая Прэзідэнт Беларусі Аляксандр Лукашэнка наведаў у суправаджэнні Дзяржаўнага Сакратара Папы Францішка кардынала П’етро Параліна выстаўку беларускіх абразоў XVII-XXI стст., экспазіцыя якіх разгарнулася ў музеі Ватыкана.

Дзяржаўны Сакратар Папы далучыўся да кіраўніка беларускай дзяржавы непасрэдна падчас агляду выстаўкі. Аляксандр Лукашэнка выказаў упэўненасць, што гэта толькі першы значны крок у развіцці музейнага супрацоўніцтва паміж Беларуссю і Ватыканам і за гэтай выстаўкай пойдуць многія іншыя цікавыя і маштабныя праекты.

Аляксандр Лукашэнка перадаў у дар музею сучасную беларускую ікону, а асабіста кардыналу П’етро Параліну ўручыў набор марак на рэлігійную тэматыку.

Выстаўка «Іканапіс Беларусі XVII-XXI стагоддзяў з калекцыі Нацыянальнага мастацкага музея Рэспублікі Беларусь» адкрылася ў музеі Ватыкана 18 мая і прымеркавана да Юбілейнага Года Міласэрнасці, абвешчанага ў Паўсюдным Касцёле Папам Рымскім Францішкам. Беларускія абразы ўпершыню экспануюцца на выстаўцы ў музеі Ватыкана.

Паводле БЕЛТА

Фота БЕЛТА