Ураджэнец Беларусі Павел Лемех OMI з супольнасці айцоў аблатаў атрымаў дыяканскае пасвячэнне. Урачыстая святая Імша з нагоды ўдзялення дыяканскага пасвячэння адбылася 28 мая ў Вышэйшай духоўнай семінарыі ў Обры (Польшча).

Разам з Паўлам Лемехам OMI дыяканскае пасвячэнне з рук біскупа Гжэгажа Бальцэрэка прынялі яшчэ пяцёра манахаў. Прэзбітэрскае пасвячэнне атрымалі сямёра аблатаў.

Эўхарыстыя — як найважнейшая мэта

«Найважнейшым часам у зямным жыцця Езуса Хрыста быў час Вячэрніка і Галгофы. Тады, у час найбольшай духоўнай цемры адбылося наша збаўленне, збаўленне свету. Таму найважнейшым часам нашага святарскага жыцця з’яўляецца час цэлебрацыі святой Імшы», — адзначыў падчас урачыстасці біскуп.

Ва ўрачыстасці прынялі ўдзел каля 50-ці аблатаў з Польшчы, Украіны, Германіі, Беларусі, Францыі, Туркменістана, Нарвегіі і Мадагаскара. Днём раней прэзбітэрскае пасвячэнне ў Кіеве атрымаў і Антон Літвінаў OMI — першы святар у гісторыі Туркменістана.

Кляштар у Обры існуе з 1291 года, калі сюды прыбылі цыстэрцыяне. Духоўная семінарыя тут працуе з 1926 года, калі з пастырскім служэннем тут спыніліся айцы аблаты. За гэты час семінарыя выпусціла больш за 750 святароў, пяць з якіх сталі біскупамі.

Сёння Місіянеры аблаты Марыі Беззаганнай нясуць сваё служэнне ў 25 краінах свету, у тым ліку і ў Беларусі. Дыякан Павел Лемех OMI стаў трэцім ураджэнцам Беларусі ў супольнасці Місіянераў Аблатаў Марыі Беззаганнай.

У Беларусі місіянеры аблаты з’явіліся перад ІІ Сусветнай вайной. У 1990-я гады яны аднавілі сваю прысутнасць на беларускіх землях. Сёння ў Беларусі на чатырох пляцоўках працуюць шэсць місіянераў аблатаў: у Мінску, Шуміліне, Селіванаўцах і Пінску.

Ілья Лапато паводле oblaci.pl