У сувязі з інфармацыяй, якая з’явілася ў СМІ з прычыны выдання «Энцыклапедычнага слоўніка рэлігійнай лексікі беларускай мовы» (Мінск 2013, аўтары: У. Завальнюк, М. Прыгодзіч, В. Раманцэвіч), які быў прадстаўлены ў Мінскім дзяржаўным лінгвістычным універсітэце на кніжнай выставе, што ладзілася ў межах XV Міжнароднага з’езда славістаў, Канферэнцыя Каталіцкіх Біскупаў Беларусі паведамляе, што выданне гэтай кнігі, адным з аўтараў якой з’яўляецца ксёндз Уладзіслаў Завальнюк, — гэта выключна асабістая ініцыятыва аўтараў слоўніка.

Каталіцкі Касцёл у Беларусі ў навучанні і літургіі карыстаецца распрацаванай і прынятай касцёльнай уладай тэрміналогіяй, якая паўсюдна выкарыстоўваецца ў зацверджаных і выдадзеных літургічных кнігах, афіцыйных дакументах Касцёла, у перыядычных каталіцкіх выданнях на беларускай мове, а таксама на афіцыйным сайце Каталіцкага Касцёла ў Беларусі.

Выдадзены слоўнік не з’яўляецца аб’ектыўнаю лексічнаю крыніцаю і таму не можа быць нарматыўным для выкарыстання ў Каталіцкім Касцёле ў Беларусі.

Каталіцкія Біскупы Беларусі

Мінск, 12 верасня 2013 г.