Напярэдадні святаў Божага Нараджэння ў дзвюх віцебскіх святынях — касцёле Святога Духа і катэдральным Езуса Міласэрнага былі праведзены калядныя выставы — кірмашы, падчас якіх супрацоўнікі гарадскога клуба ў Віцебску «Бэтэль» пры «Карытас» прадавалі вырабы, зробленыя сумесна з падапечнымі клуба — інвалідамі.

Віцебскія вернікі з ахвотай набывалі гэтыя вырабы, прычым многія — на падарункі. Aдчуваецца, што зроблена гэта ў атмасферы цеплыні і шчырасці. Як сказала адна з супрацоўніц клуба, яе падапечныя любяць іншага чалавека безумоўна, не за нешта, а проста таму, што ён ёсць. Яны не хлусяць і не зайдросцяць — яны сапраўды як дзеці, такія ж радасныя і непасрэдныя. І вырабы, зробленыя імі, трохі наіўныя, але вельмі пазітыўныя.

Сапраўды, вельмі прыемна і падарыць, і атрымаць нестандартны падарунак — не сувенір з крамы, а той, які захоўвае цеплыню чалавечых рук і сэрца. Ну і, канечне ж, другога падобнага не будзе больш ні ў кога. Атрыманыя ад продажу грошы, ідуць на патрэбы падапечных клубу — на свята ці пачастункі. І інваліды ведаюць, што на гэтыя прыемнасці яны зарабілі самі, а не папрасілі ў кагосьці. А яшчэ з дапамогай гэтых грошай хоць на крыху можна будзе паспрабаваць здзейсніць мары выхаванцаў “Бэтэля”, некаторыя з якіх шчыра вераць, што падарункі прыносіць Дзед Мароз, таму і пішуць яму лісты з просьбамі, як гэта зрабіў нядаўна Сярожа.