29 снежня ў касцёле Унебаўзяцця Найсвяцейшай Панны Марыі ў Мозыры прайшоў дабрачынны калядны канцэрт, арганізатарамі якога сталі парафія Унебаўзяцця Найсвяцейшай Панны Марыі, дабрачынны фонд “Яднаючы сэрцы” і хрысціянская царква “Рака Жыцця”.

Для сумеснага разважання над сэнсам жыцця сабраліся католікі, праваслаўныя, пратэстанты і ўсе людзі добрай волі.

У канцэрце прынялі ўдзел парафіяльны хор, дуэт “Рэнесанс”, Аляксандр Крыцкі і іншыя выканаўцы. Сабраныя сродкі будуць накіраваны на дапамогу дзецям, якія асабліва маюць у ёй патрэбу.

“Дзе чуеш спеў – туды ідзі, таму што там жывуць добрыя людзі”, - адзначыў кс. Тадэвуш Волас. “Спяваць – значыць маліцца”, - дадаў святар, цытуючы бл. Яна Паўла ІІ і св. Аўгустына.

Сустрэча ў святыні, песні і малітвы далі прысутным магчымасць акунуцца ў светлую і радасную атмасферу хатняй утульнасці і цеплыні і стаць бліжэй да Бога.

Вераніка Лапціева