Для дабрачыннага каталіцкага таварыства «Карытас» Мінска-Магілёўскай архідыяцэзіі стала добрай традыцыяй спрыяць у арганізацыі адпачынку за мяжой для беларускіх дзяцей і моладзі. У гэтым годзе 120 дзяцей наведаюць такія месцы ў Польшчы, як Лодзь, Элк і Кельцэ, а таксама «Хаўс Нідэрмюлен» у Германіі.

Як паведаміла намеснік дырэктара «Карытас» Мінска-Магілёўскай архідыяцэзіі Вольга Лабуць, больш за 120 дзяцей з парафій архідыяцэзіі адпачылі ці яшчэ адпачнуць у Польшчы і Германіі. Гэта дзеці з Гатава, Лошыцы, Клецка, Крупак, Узды. У склад груп уваходзяць «сіблінгі» (дзеці з сем'яў, дзе адзін з дзяцей інвалід).

У чэрвені групы адпачывалі ў Элку, а ў ліпені — у Лодзі. З 27 ліпеня дзеці адпачываюць у Кельцах, дзе будуць да 6 жніўня. Падчас адпачынку гэтыя групы звычайна суправаджаюць валанцёры з вышэйпералічаных парафій.

Для 34 дзяцей, як распавяла намеснік дырэктара архідыяцэзіяльнага «Карытас», арганізаваны адпачынак у Германіі, у моладзева-хрысціянскім летніку «Хаўс Нідэрмюлен». Адна група пад кіраўніцтвам педагога, перакладчыка і аніматара адпачывае з 20 ліпеня па 2 жніўня, а другая паедзе на адпачынак у перыяд з 3 па 18 жніўня. У склад груп увайшлі дзеці з парафій Сухарава (Мінск), Барысава, Мядзеля, Слуцка, Салігорска.

Падчас такога адпачынку дзеці змяняюць звыклыя для сябе абставіны, пазнаюць культуру і традыцыі іншых краін. Для іх праводзяцца экскурсіі, выезды ў забаўляльныя цэнтры і гістарычныя месцы. Апрача таго, дзеці знаёмяцца з цікавымі людзьмі, займаюцца спортам, вучаць мову краіны, якая запрасіла іх да сябе.

(AYU)