Дабрачынны фонд «Адкрытыя сэрцы» ладзіць вулічную фотавыставу пад назвай «Мяне магло б не быць». Падтрымаць новы праект фонду можна праз платформу «Мае сэнс».

Фотавыстава будзе складацца з фатаграфій дзяцей, выратаваных дзякуючы працы валанцёраў фонду. Арганізатары і валанцёры «Адкрытых сэрцаў» просяць падтрымаць праект – фотавыставу «Мяне магло б не быць» на платформе «Мае сэнс».

Асабліва ў гэтай справе патрабуецца ўдзел мінчан, якія могуць выставіць на платформе сваю сустрэчу ў падтрымку праекта. Усе астатнія могуць дапамагчы малітвай або непасрэднымі ахвяраваннямі на рахунак «Адкрытых сэрцаў».

«Гэты праект праводзіцца паралельна з выставай «Два шляхі». Фотавыставай мы хочам паказаць, што абарона жыцця прыносіць канкрэтныя плады. Калі ты бачыш гэтыя плады,то разумееш, што ёсць сэнс маліцца. Гэта такі наглядны прыклад эфектыўнасці», - зазначае арганізатар фонду «Адкрытыя сэрцы» Уладзіслаў Валаховіч.

Фотаздымкі выратаваных дзяцей можна ўжо зараз паглядзець на афіцыйным сайце фонду «Адкрытыя сэрцы».

Дабрачынны мясцовы фонд «Адкрытыя сэрцы» быў створаны ў Магілёве ў 2009 годзе. Асноўнай мэтай фонду з’яўляецца абарона жыцця ад зачацця да натуральнай смерці і абарона натуральнай сям’і.

Фонд займаецца арганізацыяй малітвы ў гінекалагічных аддзяленнях Віцебска, Магілёва і Баранавіч, рыхтуе валанцёраў, праводзіць малітвы ў касцёлах у інтэнцыі ненароджаных дзяцей і ў абарону традыцыйных сямейных каштоўнасцяў.

Валанцёры «Адкрытых сэрцаў» таксама аказваюць дапамогу жанчынам, якія адмовіліся рабіць аборт, займаюцца падрыхтоўкай маладых пар да вянчання, выкладаюць «Метад натуральнага распазнавання плоднасці», чытаюць лекцыі ў парафіях і навучальных установах.

Марына Валасар