11 лютага ў Гродзенскім абласным драматычным тэатры адбылося ўрачыстае адкрыццё XIV фестывалю «Каложскі дабравест». Сапраўдным падарункам для знаўцаў царкоўнай музыкі стала знакамітая араторыя мітрапаліта Іларыёна (Алфеева) «Жарсці па Мацвею» ў выкананні заслужанага калектыва Рэспублікі Беларусь «Гродзенская капэла».

З прывітальнай прамовай выступіў і старшыня Галоўнага ўпраўлення па ідэалагічнай працы, культуры і па справах моладзі Гродзенскага аблвыканкама Павел Скрабко, а таксама былі зачытаныя звароты міністра культуры Беларусі Барыса Святлова і Упаўнаважанага па справах рэлігій і нацыянальнасцяў Леаніда Гулякі.

Кульмінацыяй цырымоніі адкрыцця стала выкананне араторыі мітрапаліта Іларыёна (Алфеева) «Жарсці па Мацвею». Гэта манументальны твор для салістаў, хору і аркестра. У аснову твора пакладзена апавяданне з Евангелля паводле Мацвея, прысвечанае мукам і смерці Езуса Хрыста. Фрагменты Евангелля чаргуюцца з музычнымі нумарамі — рэчытатывамі, хорамі, і арыямі, тэкст якіх запазычаны галоўным чынам з праваслаўнага набажэнства Вялікага тыдня. Выконваў знакамітую араторыю Заслужаны калектыў Рэспублікі Беларусь «Гродзенская капэла».

Два наступныя дні працы фестывалю будуць прысвечаны конкурсным праслухоўванням ўдзельнікаў. Акрамя таго, вечарам 12 і 13 лютага адбудуцца пазаконкурсныя выступленні харавых калектываў. Пераможцы конкурсу будуць абвешчаны на заключным гала-канцэрце фестывалю 14 лютага.

Таксама ў межах Міжнароднага фестывалю ў хатняй святыні святых Барыса і Глеба ў Гродне 8 лютага адкрылася выстава сучаснай іконы. Прадстаўленыя працы з’яўляюцца вынікам творчасці беларускіх, украінскіх і польскіх мастакоў, якія штогод збіраюцца на іканапісныя пленэры ў невялікай польскай вёсцы Новіцы.

Выстава працягнецца да 8 сакавіка.

Наведаць выставу можна штодзённа з 10.00 да 18.00 па адрасу вул. Каложа, 10.

Паводле orthos.org, (AYU)