Сёння, 17 кастрычніка, адзначаецца 100-годдзе з дня нараджэння папы Яна Паўла I. Патрыярх Венецыі кардынал Альбіна Лучані быў абраны на Святы Пасад у жніўні 1978 г., пасля смерці Паўла VI, і прабыў на ім усяго 33 дні, памёршы ад сардэчнага прыступу 28 верасня 1978 г.

Ян Павел І нарадзіўся ў сям’і рабочага-будаўніка, які лічыў сябе сацыялістам. Вучыўся ў Папскім Грыгарыянскім універсітэце, дзе атрымаў ступень доктара тэалогіі. Пасля абрання на Святы Пасад Папа распавёў журналістам пра сваіх любімых пісьменнікаў, сярод якіх Марк Твэн, Франчэска Петрарка, Вальтэр Скот, Чарльз Дзікенс, Гілберт Кій Чэстэртан.

Як адзначае Ватыканскае радыё, Ян Павел І выказваўся супраць палітыкі «гістарычнага кампрамісу», прапанаванай італьянскімі камуністамі, што не перашкаджала яму прызнаваць за католікамі права быць членамі кампартыі пры ўмове захавання імі веры. Пра атэізм Папа казаў, што адна з прычын, якія нараджаюць яго, заключаецца ў супярэчнасці паміж словамі і справамі Касцёла.

28 верасня 1978 г. у Рыме выйшлі тэрміновыя выпускі газет з велізарнымі загалоўкамі аб смерці папы Яна Паўла I, які раніцай быў знойдзены мёртвым у сваёй спальні. У 2003 г. пачаўся беатыфікацыйны працэс гэтага Пантыфіка.

(AG)