28 кастрычніка 2011 г. у Ватыкане Святы Айцец сустрэўся з удзельнікамі Дня разважання, дыялога і малітвы за мір і справядлівасць у свеце, які праходзіў напярэдадні ў італьянскім Асізі. Папа прывітаў прадстаўнікоў шматлікіх рэлігій і яшчэ раз падзякаваў за гатоўнасць прыняць удзел у форуме, які праходзіў у 25-ю гадавіну першай сустрэчы ў Асізі, натхняльнікам і арганізатарам якой быў бл. Ян Павел ІІ.

Бэнэдыкт XVI адзначыў, што у пэўным сэнсе асізская сустрэча стала адлюстраваннем імкнення мільярдаў мужчын і жанчын ва ўсім свеце да барацьбы за справядлівасць і мір. «Гэта таксама знак сяброўства і братэрства, што заквітнеў як плён высілкаў шматлікіх піянераў такога тыпу дыялога», — прыводзіць словы Папы Беларуская рэдакцыя Ватыканскага радыё.

Выказваючы падзяку ўдельнікам форуму, якія «раздзялілі гэтую пілігрымку», каб «пабудаваць лепшы свет», Святы Айцец адзначыў: «Падарожжа духа заўсёды з’яўляецца падарожжам міру».

Падобныя сустрэчы, як падкрэсліў Пантыфік, дастаткова выключныя і рэдкія, але «яны з’яўляюцца яркім выразам таго факту, што кожны дзень у нашым свеце людзі розных рэлігійных традыцый жывуць і працуюць разам у гармоніі».

«Мы ідзём кожны сваёй дарогай, але давайце чэрпаць сілы з гэтага вопыту і, дзе б мы ні былі, давайце працягнем аднаўляць сябе на шляху, які вядзе да ісціны, у пілігрымаванні, якое вядзе да міру», — падсумаваў Святы Айцец.

На міжрэлігійнай асамблеі ў Асізі прысутнічалі пасланцы 31 хрысціянскай супольнасці, дэлегаты нацыянальных біскупскіх канферэнцый, Патрыярхі і архірэі Усходніх Цэркваў, дэлегацыя англіканскай супольнасці на чале з арцыбіскупам Кентэрберыйскім Роўэнам Уільямсам. У вялікай групе прадстаўнікоў Праваслаўных Цэркваў знаходзіўся Патрыярх Канстанцінопальскі Барталамей I. У складзе дэлегацыі Маскоўскага Патрыярхата быў Мітрапаліт Мінскі і Слуцкі Філарэт, Патрыяршы Экзарх усяе Беларусі.

У форуме прыняло ўдзел 170 прадстаўнікоў розных нехрысціянскіх рэлігій — юдэі, мусульмане, індуісты, сікхі, будысты, канфуцыянцы, сінтаісты, а таксама прадстаўнікі традыцыйных вераванняў Афрыкі, Аўстраліі і Амерыкі.