Музыка Мендэльсона дэманструе перамогу дабра і надзеі над трагедыямі чалавецтва. Яна паказвае, што «сярод болю і пакут заўсёды ёсць прамень святла». Так ахарактарызаваў творы, абраныя Бэнэдыктам ХVI для канцэрта з нагоды яго 85-годдзя, італьянскі дырыжор Рыкардо Шайі. Канцэрт адбудзецца 20 красавіка ў зале Паўла VI у Ватыкане ў выкананні лейпцыгскага аркестра Гевандхаўса пад кіраўніцтвам дырыжора Шайі.

У інтэрв’ю італьянскаму выданню «Avvenire» Шайі ўзгадаў адзін з момантаў «Песні хвалы» Мендэльсона, калі тэнар спявае «Мы крычалі ў цемры». «Гэта самы драматычны момант, які ставіць пытанні адносна смяротнасці і прызначэння чалавека», — словы вядомага італьянскага дырыжора прыводзіць Ватыканскае радыё.

Рыкардо Шайі ўзгадаў таксама візіт яго сям’і ў Ватыкан у 1964 г. Тады яму было 11 гадоў. Падчас аўдыенцыі ў папы Паўла VI бацька Шайі, Лучана, уручыў Пантыфіку свой музычны твор «Missa Papae Pauli», які ён прысвяціў Святому Айцу.