На заканчэнне агульнай аўдыенцыі 29 жніўня Святы Айцец Бэнэдыкт XVI прывітаў групу французскіх міністрантаў, якія разам са сваімі душпастырамі прыбылі ў Рым, каб пазнаёміцца з вялікай хрысціянскай спадчынай Вечнага горада і памаліцца каля магіл святых апосталаў. Звяртаючыся да міністрантаў, Папа заклікаў іх усведамляць важнасць служэння, якое яны здзяйсняюць у Касцёле.

«Дарагія сябры, служэнне, якое вы верна рэалізуеце, дазваляе вам быць асабліва блізкімі да Хрыста ў Эўхарыстыі. Вы маеце вялікі гонар стаяць побач з алтаром і Панам. Усведамляйце важнасць гэтага служэння для Касцёла і саміх сябе. Гэта з’яўляецца для вас цудоўнай магчымасцю, каб узрастаць у сяброўстве і асабістых адносінах з Езусам», — сказаў Папа.

Як інфармуе Ватыканскае радыё, Бэнэдыкт XVI заклікаў міністрантаў не баяцца дзяліцца з іншымі радасцю, якую яны атрымліваюць ад прысутнасці побач з Богам. «Няхай вашае жыццё стане сведчаннем шчасця, якое паходзіць ад блізкасці з Панам Езусам. І калі ў адзін цудоўны дзень вы пачуеце, што Ён кліча ісці за Ім шляхам святарства ці манаскага жыцця, адкажыце Яму», — дадаў Папа.

У пілігрымцы, якая праходзіць пад дэвізам «Служэнне Пану — радасць чалавека і Бога», прымаюць удзел каля 2600 французскіх міністрантаў. Іх суправаджаюць 10 біскупаў і каля 100 святароў і семінарыстаў.