14 лістапада 2011 г. Прэзідэнт Беларусі Аляксандр Лукашэнка сустрэўся са старшынёй Папскай рады спрыяння хрысціянскаму адзінству кардыналам Куртам Кохам і Мітрапалітам Мінскім і Слуцкім Філарэтам. На сустрэчы прысутнічалі таксама Апостальскі нунцый у Беларусі арцыбіскуп Клаўдыё Гуджэроцці і Мітрапаліт Тадэвуш Кандрусевіч.

У нашую краіну кардынал прыехаў для ўдзелу ў канферэнцыі, прысвечанай дыялогу паміж Праваслаўнай Царквой і Каталіцкім Касцёлам.

Аляксандр Лукашэнка адзначыў, што ў Беларусі адсутнічаюць міжканфесійныя канфлікты, і краіна можа быць прыкладам добрых узаемаадносінаў розных рэлігій. Як паведамляе БелТА, Прэзідэнт падзякаваў Каталіцкаму Касцёлу за падтрымку, якую ён аказвае Беларусі, у тым ліку на міжнароднай арэне.

У сваю чаргу кардынал Кох адзначыў, што гэта першы яго візіт у нашую краіну. «Для мяне вялікай радасцю было бачыць поўныя цэрквы, што сведчыць, што не толькі рэлігія жывая, але жывая вера ў народзе», — адзначыў іерарх.

Мітрапаліт Філарэт лічыць канферэнцыю падзеяй як у рэлігійным, так і ў агульнакультурным жыцці не толькі Беларусі, але і ў Еўропе. «Мы бачым сваю задачу ва ўмацаванні кантактаў Царквы і грамадства і ў падтрымцы дыялога паміж прадстаўнікамі розных рэлігійных традыцый», — адзначыў іерарх.