У супольнай Эўхарыстыі, якую ўзначаліў арцыбіскуп Тадэвуш Кандрусевіч, прысутнічалі ўсе біскупы Беларусі, біскупы з суседніх краін, сярод якіх біскуп Элцкі (Польшча) Ежы Мазур, арцыбіскуп Пётр Мальчук з Украіны, Мітрапаліт архідыяцэзіі Маці Божай у Маскве арцыбіскуп Паоло Пеццы, дапаможны біскуп Беластоцкай архідыяцэзіі Генрык Цярэшка, біскуп на пенсіі Шчэцінска-Камінскай дыяцэзіі (Польшча) Блажэй Крушыловіч, а таксама Апостальскі Нунцый у Беларусі арцыбіскуп Клаўдыё Гуджэроцці, Апостальскі візітатар для грэка-католікаў у Беларусі архімандрыт Сяргей Гаек, прадстаўнік Беларускай Праваслаўнай Царквы — епіскап Бабруйскі і Быхаўскі Серафім (Беланожка), прадстаўнік лютэранскай супольнасці пастар Уладзімір Татарнікаў, прадстаўнікі ўлады і дыпламатычнага корпусу, святары, кансэкраваныя асобы і вернікі як з усёй Беларусі, так і з суседніх дзяржаў, дзе вучыўся і працаваў арцыбіскуп Тадэвуш Кандрусевіч.

 

 

 

Пасля прывітальнага слова на распачацце святой Імшы, якое прамовіў дапаможны біскуп Мінска-Магілёўскай архідыяцэзіі Юрый Касабуцкі, арганізатар урачыстасці, было зачытана адрасаванае Мітрапаліту слова Папы Францішка, скіраванае на гэтую Імшу.

 

 

Падчас гаміліі Мітрапаліт Тадэвуш Кандрусевіч звярнуўся не як звычайна да прысутных вернікаў, але скіраваў пытанні да самога сябе: «Ці заўсёды я заставаўся верным? Ці заўсёды быў адважным у абвяшчэнні Божага слова?» Таксама іерарх склаў перапрашэнні за недакладнасці і памылкі перад тымі, да каго Бог паслаў яго несці паслугу і папрасіў аб малітве.

З вялікім узрушэннем арцыбіскуп узгадваў момант, калі святы Ян Павел ІІ удзяляў яму біскупскую сакру ў базыліцы св. Пятра, малітву перад улюбёнай скульптурай Вялікага Папы — П'етай Мікеланджэла, і поціск рукі Папы разам са словамі вельмі моцнымі: «Тадэвуш, я малюся за цябе!»

 

 

Як гэта, калі за цябе моліцца святы? Хочацца ў такі момант скіраваць сваё пытанне да Мітрапаліта і да ўсіх тых, каму Ян Павел ІІ абяцаў сваю малітву.

Мітрапаліт падкрэсліў, што для яго вельмі важным ў справе адраджэння было «не быць толькі сведкам, але ўдзельнікам пераменаў», самому гэтыя перамены ствараць, дзейнічаць, сеяць і прыносіць плён.

 

Іерарх звярнуўся да ўсіх святароў Мінска-Магілёўскай архідыяцэзіі, нагадаўшы, як важна быць разам, быць аб’яднанымі, складаючы адзіны прэзбітэрый, бо «калі мы аб’яднаныя, мы можам быць моцнымі».

З асаблівай увагай Мітрапаліт звярнуўся да моладзі, сказаўшы, што моладзь ідзе да яго, не баіцца прыходзіць, а ён у сваю чаргу адкрыты на моладзь.

 

«Дзякуй, мама! Дзякуй, тата!» — сказаў іерарх, дзякуючы сваім бацькам, і прыгадаў момант, калі ён выпадкова знайшоў у малітоўніку сваёй маці «Малітву маці аб святарскім пакліканні сына».

 

Напрыканцы Імшы госці склалі свае віншаванні і пажаданні Мітрапаліту.

 

 

Ад імя Канферэнцыі Каталіцкіх Біскупаў Беларусі звярнуўся з урачыстым словам яе старшыня біскуп Аляксандр Кашкевіч. «Ужо чвэрць стагоддзя Пан Бог у сваім Провідзе заклікае Вас да складаных, адказных заданняў, і ўжо чвэрць стагоддзя Вы з поўнай адданасцю і самаахвярнасцю служыце Касцёлу і Божаму люду, спачатку як Апостальскі адміністратар для католікаў Беларусі, затым як арцыбіскуп у Маскве, цяпер як арцыбіскуп Мітрапаліт Мінска-Магілёўскі», — адзначыў біскуп і пажадаў, каб асабісты прыклад веры і даверу да Хрыста, які дае Мітрапаліт, узмацняў усіх, хто ідзе шляхам хрысціянскага жыцця.

Ад імя дзяржаўных уладаў павіншаваў іерарха Упаўнаважаны па справах рэлігій і нацыянальнасцяў Леанід Гуляка, які адзначыў, што Каталіцкі Касцёл у Беларусі з'яўляецца актыўнай часткай грамадства, якая займае дзейсную пазіцыю ва ўмацаванні дабра, міласэрнасці і служэнні людзям ў грамадстве, і пажадаў іерарху духоўнай моцы ў справе служэння Беларусі і Каталіцкаму Касцёлу.

 

 

Падкрэсліўшы важнасць еднасці ў нясенні хрысціянскіх каштоўнасцяў, якія здольныя захаваць будучае пакаленне, звярнуўся са словамі віншавання епіскап Бабруйскі і Быхаўскі Серафім.

Заклікаў усіх маліцца за Мітрапаліта Тадэвуша Кандрусевіча прадстаўнік Лютэранскай Царквы пастар Уладзімір Татарнікаў, які ў сваім слове прыгадаў, як 10 гадоў назад пазнаёміўся з арцыбіскупам, калі быў студэнтам духоўнай семінарыі ў Санкт-Пецярбургу. Таксама пастар Уладзімір Татарнікаў перадаў словы віншавання ад архіепіскапа Лютэранскай Царквы Расіі — Дзітрыха Браўэра.

Ад імя ўсіх святароў Беларусі павіншаваў Мітрапаліта дапаможны біскуп Мінска-Магілёўскай архідыяцэзіі Юрый Касабуцкі, які пажадаў, каб і надалей арцыбіскуп заставаўся прыкладам для святароў: заставаўся прыкладным душпастырам, ад слоў якога людзі напаўняюцца вялікім энтузіязмам.

Таксама да Мітрапаліта звярнуўся Апостальскі Нунцый у Беларусі арцыбіскуп Клаўдыё Гуджэроцці, які прымаў біскупскую сакру з рук Папы Яна Паўла ІІ на 13 гадоў пазней, чым Мітрапаліт.

 

З жартам і шчырай усмешкай іерарх прыгадаў, як у Кангрэгацыю па справах Усходніх Касцёлаў напярэдадні біскупскай сакры звярнуліся з просьбаю набыць пастарал для новага біскупа: «Папа хоча набыць пастарал Кандрусевічу!» «Толькі ў нас на той час былі грошы, мы пайшлі і набылі пастарал. І Вы не ведаеце, з якім гонарам я бачу яго зараз у Вашых руках!» — радасна сказаў арцыбіскуп Клаўдыё Гуджэроцці. Апостальскі Нунцый пажадаў арцыбіскупу Тадэвушу Кандрусевічу мець моцныя і шырокія плечы, каб несці на іх плён таго, што ён пасеяў.

 

У знак удзячнасці за 25-гадовае служэнне арцыбіскуп Клаўдыё Гуджэроцці перадаў Мітрапаліту срэбны медаль Папы Францішка.

Іерарху падзякаваў за прыклад годнасці і адвагі Апостальскі візітатар для грэка-католікаў у Беларусі архімандрыт Сяргей Гаек, а ад імя душпастыраў семінарыстаў Мітрапаліта павіншаваў рэктар Міждыяцэзіяльнай вышэйшай духоўнай семінарыі ў Пінску ксёндз Ян Саламон.

 

Алегарычнае і вобразнае віншаванне падрыхтавалі навучэнцы Тэалагічнага каледжа імя Яна Хрысціцеля ў Мінску, а таксама скаўты, якія прынеслі ў падарунак рог, які патрэбны чалавеку, які даносіць самую важную інфармацыю іншым людзям. «Каб Вас заўсёды было чутно ў вялікім замку, якім з'яўляецца Каталіцкі Касцёл», — пажадалі тыя, хто заўсёды «напагатове», каб служыць грамадству.

 

 

 

 

 

Ад імя кансэкраваных асобаў пажадаў Мітрапаліту «духоўнай маладосці» а. Міхаіл Цвячкоўскі MIC, а ад імя дабрачынных арганізацый Беларусі зычлівае слова прамовіў кс. Віктар Гайдукевіч SDB, дырэктар Нацыянальнага дабрачыннага каталіцкага таварыства «Карытас».

 

Шматлікія шчырыя пажаданні, віншаванні, кветкі і малітоўныя «маргарыткі» складалі вернікі, а моладзь спявала пра «Святую дарогу святара», якую і зычыла арцыпастыру, які пакліканы спаўняць Божую волю ў імя Божае і ў імя чалавечае.