Тэмай сёлетняга 23-га Сусветнага дня хворых, які адзначаецца 11 лютага, сталі словы з Кнігі Ёва:«Я быў вачыма сляпому і нагамі кульгаваму» (Ёв 29, 15).

Сусветны дзень хворых быў устаноўлены 13 мая 1992 года па ініцыятыве Папы Яна Паўла ІІ. У спецыяльным пасланні Пантыфік адзначыў, што штогадовае святкаванне Сусветнага дня хворых мае своеасаблівую мэту: «дапамагчы адчуць супрацоўнікам шматлікіх медыцынскіх каталіцкіх арганізацый, вернікам, усёй грамадскасці неабходнасць забеспячэння лепшага дагляду за хворымі і нямоглымі, палягчэння стану».

У пасланні на сёлетні Міжнародны дзень хворых Папа Франіцшак звяртае ўвагу на асобу Ёва, які карыстаўся павагай у горадзе, дзе жыў, аказваючы дапамогу бедным, сіротам і ўдовам.

У сваім пасланні Святы Айцец разглядае фразу, якая стала тэмай сёлетняга Дня хворых, з пункту гледжання «sapientia cordis» — мудрасці сэрца. На думку Пантыфіка, гэта мудрасць не тэарэтычная (абстрактныя веды), а практычнае служэнне братам і сёстрам, якія пакутуюць. Як пісаў пра мудрасць святы Якуб, яна «прыходзіць звыш, найперш — чыстая, потым — міралюбная, ласкавая, пакорлівая, поўная міласэрнасці і добрых пладоў, бесстаронняя, некрывадушная» (Як 3, 17).

Папа адзначыў, што для таго, каб аказваць дапамогу хворым, патрэбны час. Святы Айцец дадаў, што час, калі мы прабываем каля ложка хворага чалавека, з’яўляецца вельмі каштоўным, вялікім багаццем.

Папа прыгадаў на гэты конт момант, дзе Ёў пісаў пра сваіх сяброў, якія «сядзелі з ім на зямлі сем дзён і сем начэй; і ніхто не казаў яму ні слова, бо бачылі, што пакута яго вельмі вялікая» (Ёв 2, 13). Усё ж яны асуджалі яго, думаючы, што ён быў пакараны Богам за грахі.

Аднак сапраўдная дабрачыннасць, гаворыцца ў пасланні Папы Францішка на Сусветны дзень хворых, не судзіць і не чакае пахвалы за тое дабро, якое робіць.