Набліжаецца 25 сакавіка — урачыстасць Звеставання Пана. «У гэты дзень і ластаўка гнязда не віе…» — кажа беларускі народ, адзначаючы веліч гэтага свята. Гэты ж дзень Касцёл прызначыў і днём, калі кожны вернік можа распачаць асаблівую малітву за ненароджанае жыццё — акт духоўнага ўсынаўлення зачатага дзіцяці.

Гэты акт заключаецца ў тым, што чалавек дае абяцанне на працягу дзевяці месяцаў маліцца за адно зачатае дзіця, каб яно змагло з’явіцца на свет, а не стала ахвяраю аборту.

У Касцёлах Беларусі 22 сакавіка быў зачытаны пастырскі ліст біскупаў ККББ, у якім каталіцкія вернікі заклікаюцца да малітвы за ненароджаных дзяцей.

«Умілаваныя браты і сёстры! Набліжаючыся да Дня святасці жыцця, які кожны год адзначаецца ва ўрачыстасць Звеставання Пана, перад абліччам сучасных выклікаў мы яшчэ больш усведамляем, што пакліканне Касцёла — “указаць усім нанова, з яшчэ большай перакананасцю, волю развіцця чалавечага жыцця ўсялякімі сродкамі і абароны яго ад любых нападаў, незалежна ад стану і стадыі развіцця, на якой яно знаходзіцца (FC 30)», — паведамляюць біскупы.

Святы Ян Павел ІІ, адважны абаронца сямейных каштоўнасцяў і святасці жыцця, падкрэсліваў, што «Бог, Даўца і Валадар жыцця, чакае ад сужэнцаў, каб у служэнні жыццю яны ніколі не адважваліся яго забіваць. Забойства ненароджаных дзяцей — гэта вялікая знявага годнасці i справядлівасці, трэба яго бязлітасна асуджаць i рашуча адкідваць… Народ, які забівае ўласных дзяцей — гэта народ без будучыні» (пар. FC 30).

У Беларусі, дзе на сённяшні дзень аборты дазваляюцца дзяржаўным заканадаўствам, існуюць арганізацыі, якія выступаюць супраць законнага забіцця ненароджаных дзяцей. Супрацоўнікі і валанцёры гэтых рухаў ідуць у калідоры жаночых кансультацыяў, абартарыі, каб размаўляць з тымі жанчынамі, якія рашаюцца на аборт альбо за якіх вырашаюць іхні лёс і лёс зачатых дзяцей.

Сярод гэтых рухаў «Адкрытыя сэрцы», Пралайф Беларусь.

Рухі малітоўнага характару — Круцыята малітвы ў абарону зачатых дзяцей і Рух распаўсюджвання духоўнага ўсынаўлення.

Рухі абароны жыцця прапаноўваюць і падтрымліваюць усялякія ініцыятывы, якія служаць абароне жыцця дзіцяці, яго маці і сям’і.

«Абавязак служэння жыццю кладзецца на ўсіх і на кожнага з нас», — вучыў Святы Ян Павел ІІ. —Усе мы павінны несці нашаму бліжняму паслугу любові, баронячы яго жыццёі заўсёды падтрымліваючы яго, асабліва тады, калі яно слабое альбо знаходзіцца ў небяспецы» (Evangelium vitae, 77).

Да справы абароны ненароджаных дзяцей можа далучыцца кожны вернік у любы час: праз малітоўную, маральную ці матэрыяльную падтрымку тых маці, якія чакаюць дзяцей, альбо сем’яў.

Калі ж вернік жадае далучыцца да Руху малітоўнага духоўнага ўсынаўлення, то разам з гэтым павінен будзе прыняць некаторыя абавязкі, якія заключаюцца ў спецыяльнай штодзённай малітве ў інтэнцыі духоўна ўсыноўленага дзіцяці. Гэтую малітву прынята распачынаць менавіта на Звеставанне Пана, але да яе вернік можа далучыцца і ў іншы час.

Яна складаецца з адной таямніцы Ружанца, спецыяльнай малітвы, якую вернікі атрымаюць ад сваіх душпастыраў, a таксама дабравольна распачатых дадатковых рэлігійных практык (напр., пост, св. Камунія, дапамога тым, хто мае патрэбу, барацьба з дрэннымі звычкамі і г. д.).

У дзень, калі згода адной жанчыны стаць Маці змяніла гісторыю чалавецтва, ці не распачаць малітву за іншых жанчын, якія вагаюцца сказаць «так» новаму жыццю, якое ўжо распачало сваю гісторыю пад іхнім сэрцам?