2 лістапада ў Касцёле адзначаецца ўспамін усіх памерлых вернікаў. У гэты дзень прынята наведваць могілкі і асаблівым чынам маліцца за памерлых.

На працягу актавы ўспаміну ўсіх памерлых вернікаў, з 1 па 8 лістапада, Касцёл асабліва моліцца за памерлых. У гэты час вернікі маюць магчымасць атрымаць поўны адпуст, які можна ахвяраваць за памерлых. Для атрымання адпусту неабходна быць у стане асвячальнай ласкі (прыступіць да сакрамэнту пакаяння і паяднання), прыняць святую Камунію, памаліцца ў інтэнцыях Святога Айца і наведаць могілкі.

У адпаведнасці з хрысціянскай традыцыяй недапушчальна прыносіць і спажываць на могілках ежу і спіртныя напоі, а таксама класці іх на магілы. Годным знакам успаміну пра памерлых з’яўляецца запаленая на магіле свечка і кветкі, але перш за ўсё малітва.

(AG)