29 мая Каталіцкі Касцёл адзначае ўрачыстасць Унебаўшэсця Пана. Пасля ўваскрасення Хрыстус аб’яўляўся вучням і казаў пра Божае Валадарства, а на саракавы дзень на іх вачах узнёсся на неба з Аліўнай гары.

Перад самым Унебаўшэсцем Езус наказаў апосталам чакаць Спаслання Духа Святога (пар. Дз 1, 4–5). Аб сваім адыходзе да Нябеснага Айца Хрыстус сказаў ім яшчэ падчас Апошняй Вячэры.

У гісторыі літургіі ўрачыстасць Унебаўшэсця Пана вядома з IV ст.

Унебаўшэсце — трыумф, які рыхтуе свайму Сыну Бог Айцец, а таксама прадвесце паўторнага прыйсця Хрыста: «Гэты Езус, узяты ад вас на неба, прыйдзе таксама, як вы бачылі Яго, калі Ён узыходзіў на неба» (Дз 1, 11). Дні пасля ўрачыстасці Унебаўшэсця Пана рыхтуюць вернікаў да прыняцця Духа Святога.

(AG)